paper am laufmeter

brrrrrr...so, langsam aber sicher wird's do au ir usa öppä winter. zumindescht ir nacht. do hämer ez amel au öppä so um di 0 grad. aber dr tag dur mag's denn amel wieder ufwärme. i eim fall macht aber eigentlich gar nüt, wenn's dussä chli chälter isch. nämli denn, wemmer eifach nid usegoht. oder gar nid sovil ziit drzue hät. letscht wuchä hani ez für's erschtä mol die letschtä tescht gschribe bis zu de finals und drum hani det denn au no chli müessä lernä.

drzue hani ez innerhalb vo einer wuchä zwei paper gschribe im umfang vo 20 siitä. eimol über "embedded journalists" und s'ander mol drüber wie nestlé ir usa so gschäftet. beides waaaaaaaahhnsinnig interessiert. also bim 1. thema hät d'teacherin grad scho mol überhaupt kein blassä gha, vo wasi überhaupt redä, woni s'outline iigreicht han. obwohl die tantä eigentlich medie schtudiert hät. und bim anderä sind d'aforderigä scho so oberflächlich gsi, dass ez würkli eifach numä irgendöppis häsch chönä schriibä. so hani ez halt z.b. d'unterschied zwüsched em schwiizer und amerikanische wirtschaftssystem uf enerä halbä siitä erklärt. sensationell. und super tüüfgründig. öppä genau gliich interessant wie üsri group projects. zum bischpil das eint über mcdonalds. det hät's denn söttig member geh, wo sich siitewiis über s'happy meal usgloh händ, anstatt d'priisstrategie z'diskutierä. aber das isch sicher au bombig ugsecho.:/

wie au immer. mir lueged mol, wases für mini beidä lyrische ergüss git. wil mer bi sovil schriibchrampf zwüscheziitlich nid mol meh id cafeteria sind (chliinä witz, haha), hät dr öschtriicher sich denn mol uf nahrigsmittelsuechi i de dorms gmacht. und isch fündig wordä. s'1. bild stellt nämli nid öppä d'uswirkigä vom letschtä obedässä dar, sondern eine amerikanische köstlichkeit sondergleichen. ja, guet. goht so. eigentlich isch's meh fett mit läbensmittelfarb agmolet. d'zuebereitig isch folgendermassä: zügs us dr tuubä ufen täller druggä (d'form chamer drbi sälber wähle, wie mer gseht...) und denn id mikrowellä tue. fertig ist der gaumenschmaus. mmmmmmhhhhhh. wie au immer. zrugg zum interessante teil vom schtudierä.

am dunschtig isch wieder mol soccer agschatnde und wil's scho d'endrundi vo de gruppephasä gsi isch, hät sich s'international team das mol chli meh inehängge müessä. schliesslich isch's um d'playoff-quali gangä. schlussendlich hät sich die ganz sach denn aber vonelei erlediget, wil die sehr chältesensiblä amerikaner vom gägnerische team nid uftaucht sind, und mer so forfait gwunnä händ. success. tumm nur, dass mer 4 h schpöter z'nacht am 11i mitem co-ed team au no mol es game ir gröschte chälti gha händ.

aber s'wartä isch denn glücklicherwiis mit spaghetti-plausch bim jonas und bir nele überbrückt wordä. im vergliich zum 1. menu, wo i dem post erklärt wordä isch, wahrlich eine wohltat für dr eruopäisch gaume. d'cafeteria schiint nämli afangs semeschter scho meh oder weniger s'ganz budget usgseh gha z'ha, und so gits ez gäg ändi immer meh nur no so eintopf-zügs. lecker.

anyway, das ander schpiil hät denn wider erwartä doch no schtattgfundä, und mir händ au gwunnä. leider hämer bi de sportsman-ship-points ufgrund vo de affätänz, wo'd afrikaner die ganz saison am schpilfäldrand ufgfüehrt händ, so wenig pünkt gha, dass mer's nid id play-offs gschafft händ. what a pity. aber wenischtens simer bi de men drbi.


ja, ez wo's fortzue biz chälter wird, chömed natürli au immer neuii, zuvor verborgeni modischi variatione zum vorschii. ganz vorne mit dr winter-kollektion drbi isch do dr ösi, wone jaggä bsitzt, wo d'mére am pére i 100 johr nie erlaubä würd z'chaufä. grauehaft. so zumindescht d'meinig vo dr mehrheit vo üs. d'jaggä macht einem im schnitt öppä 30 johr älter, wie s'bischpil vor nele unschwer bewiist:

nachdem denn wie gseit wacker papers gschriibä worde sind, isch's am samstig wieder e mol downtown gangä. s'pre-gaming hät eimol meh bi üs im dorm schtattgfundä. mit am schtart sind näbscht de üblichä verdächtige au wieder d'schwedä gsi, wo sich mittlerwiilä als feschtä beschtandteil vo üserem usgangs-trupp etabliert händ.


ja, capitol city isch au wieder mol agschtande, drnoh traditionsgemäss s'huddle house mit sinerä sensationelle bedienig und zu guter letzt no en boxestopp bim swedish-house, wo guitar-action bis in morgä agseit gsi isch.





wili die wuchä willsgott scho bis gnueg gschriibä han, lohni a derä schtell eifach mol wieder d'bilder schprächä. d'gedanggä chan sich drbi jo jedä sälber machä...;)






nachdem mir und ar nele am suntigmorgä am 7i denn irgendwenn no die grandios idee cho isch, zum üs vo de schwedä, wo übrigens all im golf-team sind, ebe genau de sport chli nöcher bringä z'loh, simer denn am mittag zur tat gschrittä. und mer muess tatsächlich säge: gseht eifacher us, als es würklich isch. ich weiss nid gnau, öb's a de furchtbar engä hosä gläge isch, woni agha han. die hani nämli vom schwed füre presentation am mäntig gmietet gha und durs permaneti träge verzwiiflet versuecht no chli uszwiitä, drmiti morn denn nid die ganz vorschtellig dr ranzä iizüchä mues. nid dassi ez scho wahnsinnig fett wordä wär, aber waist size 31 isch denn doch eher chli knebbä...:)
wie au immer. also grad e gueti fallä händ d'nele und ich nid so gmacht. aber die anderä wanna-be-golfer näbeddra uf dr driving range händ sich teilwiis - trotz riisä usrüschtigs-brimborium - au nid grad vil gschiggter agschtellt.

aber wenigschtens hämer so nochli sport i üsers sunntigs-programm iibaut gha. tja. das wär's denn au scho gsi mit wuchä 14. nächscht wuchä dured wäge thanksgiving numä bis zum zischtig. und am mitwuch machemer üs denn mol uf zum go memphis uskundschaftä.

drvor dörfi morn ebä no e presentation haltä, wobi das no die bescht gruppä isch. das dörft also nid all zuuuu schlächt usecho. ah ja. dr grund, dassi so riisä paper schriibä mues, isch, dass mi sälber us minerä gruppe gfüüret han. dassi allerdings ez grad eifach elei das ganzi paper, wo sus 5 lüüt zäme mached, schriibe mues, hani det natürli nonid grad gwüsst gha. aber gschriibä isch gschriibä, und so hani ez wenigschtens rueh.

well then, vil schpass mit schneeschöpfä...;)