walkin' in memphis

trari-trara die post ist da. sola, demfal simer ez wieder dihei. hüt morgä bini vo üserem trip über thanksgiving zrugg cho, und langsam gohts do am endspurt am college entgäge. am 5i hani mini 2. letscht presentation gha, am dunschtig stoht denn nomol eini a und next week denn scho die erschte finals. aber redemer z'erscht mol über die schönä sachä vom college-studentä-dosii: holidays!

genau. und zwar sind letscht wuchä ir usa die wahrschindlich wichtigschtä fiirtig näbscht wiehnacht i de usa abghaltä wordä: thanksgiving. güetigerwiis hämer drum vom colleg vom mittwuch morgä a frei gha, und die ziit hämer denn natürli welä nützä, um mol paar anderi flägge vo dem land z'erkundä. dr plan drzue isch scho lang gschtande, memphis und nashville hämer welä gseh, und dr reisetrupp eigentlich au. us verschidenä gründ hät sich dr letschteri denn aber schlussendlich uf dr ösi, d'nele und mich reduziert, was ar vorfreud allerdings kein abbruch tue hät.

nid zu letscht, wil d'charrä, womer gmietet händ, nämli immer no die gliich gsi isch und üs d'mietfirma es gratis-upgrade gschänggt hät. optimal. tja, so simer denn am mitwuch mol 8 schtunde lang vo milledgeville uf memphis duregrötzt. erstuunlicherwiis hämer das zügs, trotz dr tatsach, dass mer kei chartä gha händ, rächt guet gfundä, und s'super 8 motel (womer mittlerwiilä amel scho fascht schtammchundä sind uf üsernä trips) isch denn au bald mol bezogä gsi. am dunschtig isch's denn sowiit gsi: thanksgiving.

dank dr nele, wo leider gottes, d'ziit-umschtellig vo georgia uf tennessee nonid so ganz mitübercho hät, simer denn am dunschtig am 7i ufgschtande, zum mol luegä, was memphis an thanksgiving so z'büütä hät. z'resultat isch denn relativ schnell feschtgschtande: wenig bis gar nüt. also en tipp, an all, wo irgenwenn mol thanksgiving i de staate verbringe wänd: reised nid! gönd irgend binerä familie en turkey go ässä, aber reised eifach nid...

wil memphis hät a dem dunschtig im november in etwa sovil z'büütä gha, wie nes freibad im tüüfschte winter. und nagasaki oder hiroshima händ nachem atombombä-aschlag wahrschindli no beläbter usgseh. uf all fäll hämer also öppä 70% vo de lüüt, wo uf de schtrossä umegschtüüret sind usgmacht, und von g'öffnetä gschäfter hämer nur chönä träume.

gottseidank hät üs denn aber es netts afro-amerikanischs pärli druf hiigwiisä, dass mer hüt vilicht doch no zu üserem feschttagsmahl cho chönted. und das simer denn prompt au. dass mer üserä turkey schlussendlich imne convention-center mit öppä 300 obdachlose schwarze ineh werded, hät zu dem ziitpunkt natürli no niemert gwüsst. isch aber au en anderi story...;)

nachme churzä abschtächer is sarganserland iz nochburdorf vo vilters (haha) hämer denn tatsächlich doch no e mall gfunde, wo wenigschtens es paar shops göffnet gha hät. das hät denn meh oder weniger üsrers thanksgiving grettet. wil nach öppä 4 h ziillosem umeschtüürä uf dr verzwiifletä und erfolglosä suechi nach irgendme shop, hämer denn würkli langsam checkt gha, werum's walkin' in memphis heisst...

obwohl mer am obed schliesslich no nach arkansas sind (also eigentlich eher unbewusst, wil mer vo memphis us eifach e brugg überquert händ...), und det es relativ unterhaltsams thanksgiving buffet gnossä händ, hät üs denn am fritig morgä schliesslich nümä vil ir region um memphis ghaltä.

z'rock'n'roll museum hämer üs no schnell zu gemüte gfüehrt, aber das wär's denn au gsi. uf dr fahrt nach nashville hämer üs denn öppä 1 milliard radio-spots über die billigscht iichaufs-ziit vom johr (fritig und samstig nach thanksgiving) aglost und gemäss bricht, händ die eintä läde tatsächlich scho am 4i am morgä g'öffnet gha, zum ihri sachä mit 60% rabbat azpriisä.

vo dem händ mir denn allerdings weniger mitübercho, schliesslich simer jo zum sightseeä in tennesse gsi, und nid zum shoppä. dr nomitag in nashville isch schliesslich scho bedütend vil verschprechender gsi, nid zu letscht wäg eim entscheidendä faktor: es hät lüüt det gha.
d'schtadt isch berüehmt für ihren sound und wird under känner au gern "music-city" gnennt, und das hät mer denn au schnell mol gmerkt. in dowtown hät mer an praktisch keinerä beiz chönä verbigoh, ohni dass eim irgendwo country, hillibilly oder rock'n'roll entgäge dröhnt isch. und während sich z.b. atlanta vorwiegend dur die gross zahl an schwarze penner uszeichnet, sinds in nashville d'rednecks und cowboys. die letschterä händ übrigens au keis problem es kompletts obedmohl mitme cowboy-huet vo öppe 1 1/2 meter durchmesser zue sich z'neh...

ja, am obed hämer üs das live-music feeling denn mol inezoogä und das isch würkli nid schlächt gsi. do chan sich dr freddy broder no e schiibä abschnide, würdi meinä...;)


am samstig hämer denn nomol welä downtown erkundä, aber irgendwie hät dr bus denn nid ganz mitgschpiilt. so simer denn halt chli verschpötet mitem auto vo üserem super 8 motel (richtig, scho wieder super 8) id city gfahre, was allerdings immer no z'früeh gsi isch. usser dr musig am obed hät nashville nämli näbschterä hall of fame vo irgendwelchä semi-prominentä musiker nämli nid allzuvil z'büütä, usser es paar regierigsgebäude und drum simer denn zum 2. mol a dem verlängereteä weekend is kino...

nachdem mer scho s'sarganserland in memphis aglueget gha händ, simer in nashville schliesslich no füren abschtecher uf griecheland. wie chli d'wält doch isch...haha zum zweitä. natürli nid, aber us irgendme unerfindlichä grund händ's in nashville nämli s'parthenon vo athen 1:1 nochbaut. vermuetli hät mer dr grund do drfür gäge s'entgeld vo 10 dollar chönä usegfindä, was üs denn allerdings doch chli z'vil gsi isch, zum das rätsel z'lüüfte.

tja, so hämer denn schliesslich no paar souvenir-, cowboy-schtiifel- und huet-läde abklapperet und sind denn am suntig ready gsi, zum zrugg nach atlanta fahre. underwegs hämer einewäge müessä über chattanooga und do häts sich natürli aabotä, die weltberüehmtä, sageumwobenä ruby falls z'beschtuunä.


wie sich allerdings usegschtellt hät, sind d'ruby falls kei falls, sondern eher numä ein wasserfall, und dass de 600 feet under dr erdoberflächi imne berg useschprudlet isch denn au scho z'highlight gsi. wenigschtens hät sich üserä guide echt müeh geh, die 1-stündig tour so unterhaltsam wie möglich z'mache. wobi das elei scho dur die immer gliichä wiehnachtssongs, wo eim us i derä höhli us allne mögliche ritze entgägeträllerert worde sind, zimli erschwert wordä isch. das isch wieder mol amerika gsi, du! 1/3 kilometer under dr erdä, und d'amis inschtallieret boxä zum chli jingle bells useduddlä!...;)

tja, das wär's denn au gsi mit thanksgiving. bis uf dass mer üs in memphis würkli es paar moment lang gfroget händ, öb echt en epidemie usbrochä isch, und's üs als einzigi vergässe händ, z'evakuierä, isch das echt e suuberi sach gsi.

s'wätter hät ir zwüschziit wieder chli europäischi züüg agnoh und ohni jagge goht mer momentan lieber nid verrussä. d'trochäheit hät hüt morgä in georgia mit sintfluetartigä rägegüss au ihres ändi gnoh, und drum chunt das wie gruefä, dass mer in 2 wuchä üsri koffer pagged und richtig florida abdüsed. drvor hoffi, gwünnemer die wuche no d'soccer-championship, au wenn d'chance mit üsernä schwarz-afrikanische kumpels vilicht doch nid zum beschtä schtönd...;)

hasta la vista und bis inre week!