tatarataaaaa! so, do simer also. uni isch jo bekanntlich und d'holidays vo üs studis sind in vollem gange. am letschte zischtigobed isch's vo milledgeville us losgangä z'erscht mol richtig jacksonville. dank em riisää van, wo dr jonas gmietet hät, hämer üs au kei sorgä wägem gepäck müessä mache...
dr van hät nid nur platz füre huufä gepäck gha, sondern isch au problemlos ines hotel umfunktionierbar. also zumindescht bezüglich übernachtig und so. und drum hämer die erscht nacht z'jacksonville denn grad au im auto verbrocht. am nächschte morgä isch sich denn nümä jedä sicher gsi, öb mer nur vom ne ranger, wo üs am morgä am 3 iz auto glüchtet hät, würkli do gsi isch, oder mer das nur träumt hät. aber vermuetli isch er scho real gsi...whatever.
uf all fäll simer nach derä meh oder weniger ungmüetliche nacht denn mitme suneufgang deluxe ar beach belohnt wordä. obwohl d'temperature nonid grad so florida-like gsi sind.
je süde, deschto wärmer hämer üs dänggt, und händ üs drum richtig st. augustine ufgmacht. leider isch's det aber nid würkli vil wärmer gsi, und drum hämer üseri erschtä bade-sessions für's erschtä mol müessä uf später verschiebä. gottseidank hät d'city aber no e meh oder weniger interessanti altschtadt z'büütä gha, sodass mer üs nid würkli langwiile händ müessä...;)
mit dr gliiche idee in punkto wärmi und badewetter simer am morgä druf wiiter richtig süde gfahre, und zwar nach daytona beach. leider au do: fehlanzeige betreffend bade. also eigentlich numä betreffend badewetter. dr jonas, dr ösi und ich händ üs nämlich trotzdem id fluetä gwogt, obwohl üs das erläbnis eher an üseri erschti atlantik-erfahrig in savannah erinneret hät, als an das, womer us de florida-film so kännt...
aber null problemo. schliesslich simer jo z'florida und do isch au remmi-demmi agseit, wemmer nid grad go bädelä chan. so hämer üs zum bischpil scho mol im minigolf güebt oder üs im go-kart fahre versuecht.
s'letschteri isch übrigens verglichä mit dr schwiiz spottbillig gsi. 2 schtund für 20 dollar. lächerlich eigentlich...haha. und bi de hotels hänggemer natürli au immer d'füchs usä und schtüüred jewils eifach immer die billigschte abschtiigä aa, wo i üserem coupon-heftli abbildet sind. so simer z'orlando zum bischpil mitme hotelzimmer für 37 dollar drvo cho.
die eigentliche tourischte-attraktione hämer natürli au nid verpasst. s'kennedy space center isch au scho uscheckt wordä, wobi sich dodrbi vor allem uszahlt hät, dassmer ir näbedsaison am reise sind. kei wartä, kei aschtoh, nüt. deluxe...
nachdem mer üs öppä 5 schtund wacker über raketäatriib, aschtronaute-azüüg und abschuss-plattformä informiert händ, hämer's denn aber doch mol gseh gha. übrigens isch no z'erwähne, dass d'amis alles drfür tüend, bi de touris so vil wie möglich abzsahne, wie nur irgendmöglich. uf all fäll hani scho lang nümä 250 ml cola für 4.50 dollar trunggä...;)
nachem space center simer denn no d'marina, wo z'friedrichshafen mit dr nele zämä wohnt, und mer scho z'chicago troffä gha händ, an flughafä go abholä. z'füfte wird s'übernachte natürli grad nomol billiger. obwohl ez halt amel öpper am bode schlofä mues. aber hauptsach billig.
wil s'wätter zwar immer rächt guet, aber leider halt immer nonid grad badetauglich gsi isch vo de temperaturä her, hät de jonas denn gmeint, mer chönt mol i sonen nationalpark im norde vo orlando fahrä. kei schlächti idee, leider simer aber anschinend die einzigä touris gsi, wo sich im visitor-center nochli nöcher hätted welä über d'flora und fauna informierä. und drum isch das denn au gschlossä gsi...
aber...keis problem, schliesslich hämer e chartä drbi gha, wo ungefähr 10% vo allne schtrossä im nationalpark azeigt hät, und drum simer frohen mutes mol richtig outback gfahre. en see und vil dirt hämer gfundä, aber nach öppä 7 oder 8 meilä offroad schtreggi hämer denn doch mol üseri zwiifel übercho, öb üserä voll belade van würkli s'optimal fortbewegigsmittel für die art vo schtross isch.
d'rednecks mit ihrne pick-ups, womer unterwägs atroffä händ, sind au dr meinig gsi, vilicht doch eher nid. und drum hämer die denn mol elei im wald zrugg loh und händ wieder befeschtigteri schtrossä ufgsuecht.
am gliichä tag isch's no wiitergangä richtig clearwater beach. und dr sunneuntergang isch scho mol vilverschprechend gsi. leider hät d'dame ar reception aber gmeint, mer säged grad inrä chaltfront acho und i de nächschte täg werdi's sicher nid über 20 grad. we will see. aber badet wird sicher no! nid zuletscht wäg de badhosä, woni i üserä sicher 6 stündige shopping-tour z'orlando i drü verschiedenä outlets ergatteret han. näbscht paar anderä sachä. aber das isch wieder e anderi gschicht...;)
hüt simer no i einä vo de gröschte funparks vor usa, busch-garden. luschtigerwiis ghört de eim vo de gröschte bier-produzentä vor usa, anheuser-busch. fun und bier schiint e perfekti kombination z'sii...
mir händ aber au nüchtern bis gnueg schpass gha und dank dr näbedsaison hämer maximal 2 minute vor allne bahne müessä warte. sensational! so schtellt mer sich das vor...
uf all fäll hämer so zimli alles gseh während üserem bsuech. guet, alles anderi wär au e schand gsi. schliesslich hämer 70 dollar iitrittspriis au welä useschloh...
ja, momentan simer wie gseit no z'clearwater beach, und bade schtoht morn mol ufem tagesprogramm. wenn nid morn, denn halt übermorn. und wenn denn nid, halt vilicht am fritig z'naples. wil "je süde, deschto wärmer"...hoffemer uf all fäll immer no...
ah ja, wases no z'säge git isch, dasses do mängmol chli groteski situation git. zum bischpil, wämmer mit agschaltner klima-aalag im auto fahrt, und uf 80% vo allne radio-sender wiehnachtsliedli gschpilt werded. das glichi mit dr völlig übertriibene wiehnachtsdekoration a jedem dritte huus direkt näbedem meer...
Keine Kommentare:
Kommentar veröffentlichen