rescheduling

ohhhhhh...er isch wieder do.

chum simer von chicago zrugg nach milledgeville cho isch er wieder uftaucht. ungfrogt, unerwünscht, aber gnau so nervig wie die paar woche drvor. de herr alltag. die wuchä isch an ereignislosigkeit wieder mol schwer z'überbüütä gsi. s'einzig wo wenigschtens biz drüber hinweg hät chönä tröschtä, isch gsi, dass s'wätter bi üs immer no schätzigswis 15 bis 20 grad wärmer isch als ir schwiiz. drum chamer au im oktober immer nonid würkli verrussä go ränne, wil's di bi derä luftfüechtigkeit fascht hinde usä schträlet. aber für öppis hämer jo s'gym.

under dr wuchä isch würkli au unimässig rein gar nüt los gsi, kei prüefigä, nix. es paar papers hani dörfä schriibä und eimol meh versuecht, mit all mine amerikanische teammates vo de verschiedenä group projects, mol endlich meetings abzmache. aber das isch öppä so hoffnigslos, wie wenn de öschtricher amel versuecht sini bschtelligä ir cafeteria mündlich ufzgeh...:) uf jedä fall isch es in amerika nid möglich, termin im vorus abzmache. do goht das so "I'll call u, and then we'll meet to fix that." was in etwa mit "jaja, luegemer mol, und wenn du dich nid mäldisch, machemer bis uf wiiteres mol nüt." unglaublich mit denä type. am fritig hätti zwei so tolli träffe gha, wobi dr eint denn nach drü arüef vo mir mol gmeint hät, s'gäch ez doch nid, er säg grad dr ölwächsel bi sim göppel am machä und bir andre gruppe hät einä d'gnad gha, 5 minute bevor s'treffä gsi wär, mitzteilä, dasser grad am flughafä z'atlanta schtächi, zum d'muetter vo sinerä girlfriend abzholä. "but no problem, sandro, we're goin' to reschedule it. I'll call the other guys and tell you, when we'll meet on Sunday..." mich frogts mängmol, öb sie denn amel de sunday in 3 wuchä meinet oder eifach sus so verhängt sind. hüt hätmer uf all fäll niemerd aglütet. aber was wetsch. andre länder, andre sitten.

d'wuchä isch also wieder mol us grosser langwiili beschtande, und nachdem's am mittwuch denn no spontan agfangä hät schiffä wie us chübel, häsch di würkli chönä afangä frögä, öb's das ez si chöni. gottseidank chunt nach mittwuch aber jo doch sogar au ir usa dr dunschtig (sofern er nid "rescheduled" wird, wil's öpperem grad nid passt) und denn gohts jo bekanntlich für d'schtudentä amel steil ufwärts. am obed sind dr jan (dr ander suitemate näbscht em ösi) nomol für d'soccer-league, wo nächscht wuchä afoht go trainierä. fallses bir saisoneröffnig rägne sött, hämer ez uf all fäll scho mol en vorschprung...erfahrigsmässig. ja, heigfahrä wordä simer denn vo einerä, wo sich (ebäfalls sehr vorussehend) mittlerwilä im 3. johr und somit eis semeschter vorem abschluss als "nurse" befindet und sich ez ernschthaft überleit, das zügs abzbräche, und mit business azfangä. planig isch jo alles im läbe...

x-uf alli fäll. dr dunschtigobed hämer denn no ruig agoh loh und am fritig isch grande fiesta bi de spanierinä agschtande. s'pre-gaming (ufwärme oder wie mer dem uf schwizer-dütsch au immer säge wil) hät das mol bi mir stattgfunde, wasi denn au öppä 15 minute vorem iitreffä vo de gladne gäscht vom ösi erfahrä han. nachdem alli über die tolle nägel, wo d'morgan und d'nele ez nach ihrer manicure für 15 dollar händ, gschtuned gha händ, isch denn dr pegel chli aghobä wordä. dass isch au dringend nötig gsi, wil öbed mit de spanier verbringä isch immer glich bedütend mit frogä wie "what did you do yesterday?" mit "yes" beantwortet überzcho. was eim denn nach 5, 6 frogä scho liecht uf dr sack go chan.

gottseidank isch denn aber alles ganz andersch cho: d'spanier händ's irgendwie gschafft, ihren living room ine disco mit stroboskop, verschtärcher, riiiiiisssää boxä und subwoofer z'verwandlä. somit isch gar nid an ernschthafti konversation z'dänke gsi, was üs natürli sehr entgäge cho isch. exzellenti schpanischi bowlä isch au serviert wordä, und unglücklicherwiis hät die denn au zimlich schnell dr wäg uf s'lieblingspolo vom ösi, woni zur ehr des tages träge han dörfä, gfundä. success! rot uf wiis isch e herzlich unglücklichi mischig hämer denn schpötischtens nachem wäsch-versuech dihei usegfundä, aber ja...verluscht git's immer.

anyway, zrugg zur party: die isch würkli bombastic gsi, aber nachdem denn am morgä am 2 wieder mol d'police ad tür klopfet hät, isch denn halt doch bald mol fertig gsi.

ufem heiwäg händ dr ösi und ich no spontan binrä geburtstagsfetä vomne üs unbekannte college-studi verbiglueget, aber det isch nümä würkli vil los gsi. uf all fäll hät de denn aber druf beschtande, dass mer mit ihm unebedingt no en whiskey trinkä müessed, wil er hüt sin 21igschte fiiri. und 21 in usa bedütet jo bekanntlich legal drinking. de whiskey hät's denn würkli nümä müessä si, hani denn am nächschte morgä gmerkt. s'schtudierä am morgä am 10i isch uf all fäll nid würkli liechter gfallä...

der ösi hät au sichtlich z'kämpfe gha und so isch denn dr z'morgä ebefalls mol "reschedulet" wordä. dr obed isch denn au eher relaxed agangä wordä. nachdem mer leider ufgrund verpasstem shuttle de bsuech vom college-soccer team "reschedule" händ müessä, simer denn zur morgan go movies luegä. die hät unübertriibä en fernseh so gross wie mini chaschtetüürä. und ich han weiss gott nid irgend sonen polly-pocket schrank. leider sind drfür d'farbä umso schlächter und dass hät de erschti film (dead silence) nid würkli besser gmacht. dr 2. isch denn umso unterhaltsamer gsi (date movie), sodass die allgemein schtimmig doch nochli ghobä werdä hät chönä. zum krönendä abschluss simer denn no is "scoops", DER eisdiele in milledgeville (vermuetlich au die einzig...). s'glace isch würkli nid schlächt gsi, aber für satti 5 schtutz fürä chuglä dörf mer das jo au erwartä.

anyway, das wär's gsi mit de glaub oberlangwiiligschte wuchä vo dem uslandsemeschter. hoffentlich git's bald wieder mol chli abwächslig, wobi d'chance mit dr international week, wo nächscht wuchä aschtoht und halloween in 2 wuchä eigentlich nid schlächt schtönd. und sus chani immer no go power tankä, wie dr ösi, wo d'plantane vor üserem dorm ganz bsunders is herz gschlossä hät...