abwechslung! marsch!

endlich, endlich, endlich! es hät abwechslig geh, im studentä-alltag! und das nid zu knapp...d'midterms sind mittlerwiilä au meh oder weniger guet über d'runde brocht wordä und vor zwei schtund bini grad vo chicago zrugg cho. do git's denn no en separate post drzue, aber dr ösi isch momentan grad no ir dunkel-chammerä d'föteli am entwicklä. drum verzögeret sich das no churz.

tja, drum fangmer mol mitem abwechsligs-programm vo vor anderthalb wuchä a. das hät nämli dr mit begonnä, dass d'nadia z'gfühl gha hät, jedi halbwegs kultiviert person sött ei mol im läbä d'chance wahrneh, s'"wältkulturerbe" milledgeville z'bsuechä und hät das denn drum au prompt gmacht. vilicht au eher, wil si weniger d'schtadt als ander sachä interessiert hät. haha. uf jedä fall, bin ich si denn am dunschtig uf atlanta an airport go abholä, und wil de boyfriend vo einerä vo de schpanierine grad au am dem tag acho isch, hani denn mit derä es auto gmietet. es nid ganz so eifachs unterfangä, wenn de netti vermieter unbedingt ganz sicher go will, dass bimne allfällige unfall au sicher money us switzerland nach usa flüsst und drum denn höflich forderet, dass mer das ez churz per telefon mit sinerä versicherig abklärt. am nomitag am 4i. schprich am 10i ir nacht ir schwiiz...es no vil schwirigers unterfangä, wenn d'schpanierin ihri drivers-licence nid vom appartement mitgnoh hät. guet, ich mein isch jo au nid so naheliegend. wenn ich go geld abhebä will, lohni amel au alli kreditchartä dihei...logik uf schpanisch...

anyway, irgendwie hät das denn nach langem verhandlä glich no klappet, und d'schpanierin hät denn ihren uswiis glaub am samstig gschiggt, drmit si de göppel denn au nomol hät dörfä fahrä. dr abewäg isch trotz nicht-vorhandensein vonerä charte nid allzu schwierig gsi, und so hämer denn die boy-, bzw. girlfriends ohni problem chönä abholä. ganz minim schwiriger gschtaltet hät sich denn drfür dr rückweg, wo denn nach 2 verpasste exits, vergeblichem noluegä uferä eastcoast-karte in absoluter dunkelheit (chrysler hät's offebar nid für nötig befundä, i de pc cruisers liechter iizbauä...) und aarüef an ösi, wo üs denn mit google earth irgendwo is gjät usenavigiert hät, zimli in the middle of nowhere g'ändet hät. wie au immer. gottseidank git's jo tolli tankschtellä-wart und so simer denn mit knapp 1h überziit doch no im world famous milledgeville acho. d'schpanier händ eh nüt drvo bemerkt, wili so ziilschtrebig i die falsch richtig gfahrä bin, dass nie au nur en huuch vo zwiifel hät chönä ufcho. zumindescht bi denä...;)

am fritig hämer denn s'auto grad mol no gnützt, zum wieder mol go shoppä z'goh. tja, was sus chönt mer au machä, imne staat, wo zum schätzigswiis 50% us wald, 20% wohnhüser und 30% malls beschtoht...? das mol isch die in athens ar reihä gsi, und ei mol meh händ all meh oder weniger zuegschlage. "meh" im fall vor nele, wo sich bi abercrombie und kollegen wacker ideggt hät und sicher öppä d'hälfti vom kofferruumin aschpruch gnoh hät. "weniger" im fall vom ösi, wo sich - bescheidä, wiener isch - mit 3 paar schwarze söckä und me top-modischä hoorschnitt begüegt hät. das wär's denn gsi für dr fritig. am obed isch no e ehnder laschi party vonrä dütschä ufem programm gschtande, aber us rücksicht uf d'läser überschpringemer ez die "party" lieber mol. ich mues nämli grad gähne, wenni sälber dra dängge.

drmit d'nadia nid dr iidrugg übercho hät, dasses a denä "partys" immer so zue und her goht, und eifach amel all für d'föteli gute miene zum bösen spiel mached, händ denn dr jonas und d'nele am samstig no eini duregeh. und zwar so richtig. richtig, richtig, richtig. vermuetli so zimli all internationals sind im appartement z'gascht gsi und irgendwenn am morgä am 3 händ denn d'mitbewohner vom jonas und vor nele, wo unverhofft halt scho ein tag früehner zrugg cho sind, denn gfunde, es langi. dr jonas hät das denn mitme churze "I don't care!" kommentiert, und so isch denn bald mol d'huusverwaltig uf dr plan gruefä wordä. wo die denn allerdings checkt hät, dass nid öppä d'nochbuure sich händ welä beschwerä, sondern d'mitbewohner, isch die beschwerde mitme doch eher müede lächle ad acta glegt wordä...han ich mir verzellä loh. uf jedä fall isch dr schtand der dinge momentan glaub grad so, dass d'nele und dr jonas ez denn am friide z'lieb gli mol uszüched, wil dr huussäge chli meh als schief hanget. so problem han ich nid...;)

es iischniidends erlebnis hät's a derä pardey natürli au no für dr ösi geh. er, wo sini hochleischtigs-sport-karrierä extra für's uslandsemeschter unterbrochä hät und sich sither uf plansche im pool und me prophylaktische laufschueh-chauf als sportlichi aktivitetä beschränkt hät, hät endlich welä wüssä, öb ez das mensa-ässä tatsächlich asetzt oder nid. und es tuet. satti 5 kilo meh uf dr woog hät's gheissä und drum isch denn für dr rescht vom obed au nur no miller LITE drunggä wordä. und zum z'morgä isst er sither au nur no 3 toast...

zum wieder in form cho, hät dr ösi denn churzerhand entschlossä, sis pool-pensum für die nächschte wuchä ghörig id höchi z'schruube. und wil ich no für mini midterms z'lernä gha han, häter denn amel grad d'nadia mitgnoh det herä. und d'resultat vo denä usflüg sind schpötischtens am mitwuch unübersehbar gsi. amel farblich...

nid vergässe z'erwähne dörfi natürli, dassi näbscht cookies und pudding endlich wieder mol richtigi schwizer-schoggi zum dessert han dörfä ässe. und zwar nid irgendwelchi toblerone, wo's do änä zämegschmulzä händ, sondern 100% swiss made and imported by nadia ovomaltine schoggi. sensationell! also do müend d'amis mit ihrne hershey-bars und godiva-chuglä no paar johr experimentierä. würkli top...

ja, mit sovil abwächslig isch die wuchä durä wie im flug, und am dunschtig isch denn jo einewäg scho wieder wuchenend gsi. z'erscht simer dodruf abe mol is international house of pancakes dr appetit go schtile und wil wuchenendafang=party bedütet, isch denn au de programmpunkt abghockt wordä. das mol imne huus, vo eim us belize. au rächt amüsant gsi, vor allem, wo s'schwedische golf-team vor uni denn no uf dr plan träte isch. aber das isch en anderi story.

am fritigmorgä isch's in aller früh losgangä richtig atlanta zum det dr flüüger nach chicago z'neh und d'nadia wieder back to switzerland z'verabschiidä. chicago hät einiges z'büütä gha. hell yeah, wenn milledgeville nur en zähntel so geil wär, würdi dr master do machä, aber ebä. leider isch das nid dr fall. haha.

also freued eu scho mol uf dr nächschti post. mit vilne tollne fotne. und no vil tollerä videos. vo und mit matthias "ösi" schelnast. köstlich. verschprochä!