sweet home chicago!

juhuuuuu! es goht wieder ufwärts! zumindescht mit dr allgemeinä schtimmigslaag! wie akündiget simer am weekend uf chicago und das isch so zimli s'beschtä gsi, womer bis ez ir usa an usflüüg erläbt händ. und wie regelmässigi läser wüssed, isch d'konkurrenz us river-rafte mit de baptischte und 4 schtündige baseball-games nid chli gsi...

am fritig morge früeh isch's also losgange. mit üserem pimp-mietcharrä (http://www.dodge.de/avenger/index.html) simer am morgä am halbi 7i uf atlanta cruised zum dr flüüger au jo rächtziitig z'verwütschä. im prinzip sind all meh oder weniger guet vorbereitet gsi. einigi eher guet, wie d'nadia und ich, anderi eher schlächter, wie dr ösi, wo mis weckä am füf vor halbi mitme verdutzte blick uf's handy undem kommentar "geh, do hob' i wohl snooze drückt. koa wundert geht dea aloam net ob...". au eher schlächter vorbereitet isch d'nele gsi, wo am morge am 2 no e öppä anderthalb schtündigi diskussion mit ihrne appartement mates hät dörfä füehrä, über theme wie "air-condition-temperaturregelungsunterschiede von mehr als 2 grad", "abbrennen von fremdem eigentum in form von 3 teelichtern", "benutzen von fremdem besteck" und so wiiter. uf all fäll schiinet det d'zeichä stark uf "umzug" z'stoh.

d'fahrt uf atlanta isch keis problem gsi, schliesslich bini jo ei wuchä drvor scho mol gnau dr glich wäg gfahre und au am flughafä sälber isch alles glatt gloffä. bis uf dass dr ösi, wo i sinerä grossartige vorbereitig dr reisepass vergässe hät, e spezielli sicherheitskontrolle über sich hät dörfe ergoh loh und schliesslich mit irgendme lächerliche studentäuuswis tatsächlich uf dr flüüger gloh worde isch. nachdem mer denn d'nadia verabschiedet händ, und s'üs ir economy PLUS klasse gmüetlich gmacht händ, simer nach öppä 1 1/2 schtund flug in windy city acho. nur scho dr aablick vor skyline im aflug isch vielverschprechend gsi und womer nach öpperä schtund geratter mit dr metro z'mitzt im center acho isch, hät denn definitiv niemert meh d'begeischterig chönä verbergä.

wiemer uf de bilder wahrschindli relativ guet erkennä chan. eifach unglaublich, wie total andersch d'city im verglich zu atlanta isch. verglich mit milledgeville hät gar niemert gwogt azschtellä, sus wäredmer vermuetli ines kollektivs depressiv-stadium verfallä...;) würkli bombastisch. womer us de metro usecho sind und s'ghupet, g'hornet und glärmet hät, händ würkli all vo üs s'gfühl gha, dass mer wohl eher do es uslandsemeschter hät söllä machä. d'nele hät drum denn au relativ schnell agfangä, sich alli näme vo de colleges und unis ir schtadt z'merkä, wil mer weiss jo nie, wenn mer vilicht sis master-studium z'chicago mache wett...

nachem erschtä churzä umewanderä und dr feschtschtellig, dass einigi breitegrad nördlich leider gottes au einigi celsius grad chälter bedütet, hämer denn ar union station zwei kollegä vor nele und em jonas troffä, wo ihres uslandsemeschter in indianapolis mached. det hät's im verglich zu milledgeville zwar öppä 20 mol meh lüüt und sogar einigi skyscraper, aber au die sind rächt beidruggt gsi, vo dem wo's fang gseh gha händ. zum üs mol chli en überblick z'verschaffä, simer als erschts denn mol uf dr sears tower, wo momentan sehr sehr beduurenswerter wiis leider nur meh dr 3. gröschtig tower vor wält isch, aber mol de gröscht gsi isch. und immer no dr gröscht vo north america isch. und das isch denn au immer wieder betont wordä. sogar ir fahrt im lift in 103. stock, wo zwei animierti vögel das nomol und nomol und nomol betont händ. d'ussicht isch denn nid schlächt gsi, wobi's für 12.95 dollar d'schiibä scho chli besser hätted dörfä putzä. aber was wetsch.

nachdem mer also mol ganz klar gseh händ, womer so hi chönti, hämer üs denn richtig navy pier ufgmacht. sone art vergnüegigs-meile am lake michigan mit ganz vil canada-gäns, wo's am ösi so richtig atue händ. allerdings hämer det denn bald mol gmerkt, dass usser gäns eher am obed öppis los isch, und drum hämer üs denn wieder richtig downtown ufgmacht. schliesslich muessmer jo au ab und zue mol öppis ässe. und das hämer denn wie eigentlich immer a dem wuchenend im mcdonalds gmacht.

allgemein isch scho am 1. tag ufgfallä, dass d'lüüt im norde a) vil dütlicher englisch reded, als das gmurmel, wo's do bi üs im südä amel so vo sich gänd und b) au vil europäischer azogä sind und sich so benehmed. allerdings git's au do ir city lüüt - und zwar ganz sicher öppä 25% - wo ihri chleiderschränk us equipment vom lokale sportteam zämeschtelled. i dem fall de chicago bears, bzw. de cubs und so hät mer unübertriibä jedä 10. meter garantiert öpper in orange-blau oder blau-wiis-root atroffä.

s'abendmahl hämer denn bim chef petro zu üs gnoh. leider hämer de petro nie gseh, drfür sini chellnerin, wo sehr bemüeht gsi isch um üs, und sich für ihri bemüehige schätzigswiis ein dollar pro "honey", "cherry", "gentleman", "darling" und "sweetie" als trinkgeld berechnet loh hät. andersch chamer nid erkläre, wiemer uf 17 dollar für en 15 minute service chunt. aber anyway. langsam isch dunkel wordä und so hämer denn mol üsers hostel ufgsuecht. das isch öppä 12 metrostations vo downtown entfernt gsi und zwar in loyola. loyola wo übrigens glichzitig die einzig jesuite uni in ganz chicago beherbergt und so hämer üs a dem ort natürli beschtens ufghobä gfühlt. s'hostel isch denn so gsi, wie hostels halt amel so sind. nid dräckig, aber doch nid grad unbedingt deluxe. aber für zwei nächt hämer das chönä verschmerzä. au wenn's kein zimmerschlüssel geh hät. aber anyway. dr obed isch denn imne pub in loyola usklungä loh wordä, wo mol so richtig pub-atmosphere verschprüeht hät. amel meh wie'd bierhalle und au s'pub z'flums...

tja, was ghört mittlerwiilä zu jedem usflug? richtig, shopping. und drum simer denn am samstig wieder mol churz ine mall, wo sich dr ösi, wo scho am morgä am halb 8i ufgschtande isch, dr wäg drzue beschriibä loh hät. allerdings isch's det öppä so gsi, wie imne schwiizer c&a und näbscht burton-shirts sind irgendwelchi feinripp-unterliibli apriisä wordä. uf all fäll, hät denn det niemert dr reiz verschpürt, irgendöppis z'chaufä. drfür umso meh im gebiet rundum dr water tower place, wo en riiisigä h&m, en macey's mit 150 shops (abercrombie und hollister und das ganz gschmäus), north face und was des shoppers herz halt so begehrt, z'büütä gha hät. dr ösi hät sich wieder mit möwe und elch chleider vo abercrombie und hollister iideckt und ich han eigentlich e super tolli jacke im h&m welä chaufä, wil's in chicago doch eis, zwei grad chälter gsi isch, als im nordä. aber entweder händ amel d'L grössenä a mim körper usgseh, wie XS oder dr priis isch für mich zu XL gsi. anyway, kauft isch denn doch relativ vil wordä, zumindescht vo de anderä...

ja, irgendwenn isch denn wieder night wordä, und das isch würkli sensationell gsi. ganz geil, hät ez das alles usgseh und nach de obligate picture-sessions a de touri-spots, wie ar "bean" zum bischpil, simer denn au no is hard rock cafe.

säb hät sich denn doch eher als mittelgrossä reinfall usegschtellt und d'untehaltig hät lediglich us sound us EINERÄ box, erä reisegruppä mit gschätztem durchschnittsalter 70i ufwärts, und erä abschlussball-truppä vo high-school girls, wo sich bi jedem schritt fascht d'scheichä uf ihrne stöckli-schueh brochä händ, beschtande. nid würkli rockig. do händ denn au de original bustier vor madonna oder d'gitarre vo irgendemne status quo chlaus nüt meh usegrissä. und so simer denn halt wieder in loyola dr schlummertrunk go neh.

a dem obed han mer natürli no alli sehenswürdigkeitä vor top-usbildete stadtfüehrerin nele backhaus erkläre loh (siehe bild), und so simer denn top-gwappnet gsi für dr letschti tag. nachdem mer wieder im dunkin' donut z'morgä gha händ und sich d'vermuetig erhärtet hät, dass d'inder-staff vo üserem hostel vermuetli abwächsligswis au im dunkin' hinderem tresä stoht, simer denn wieder richtig downtown.

und zwar füre stadtrundfahrt. nachdem mer denn dr 1. trolley bus mitem wohl nervigschte kommentator bim erschtbeschtä hop-off-point verloh händ, hämer üs denn au grad mol alli gratis probä, wo mit dr stadtrundfahrt verbunde gsi sind inezogä. so zum bischpil popcorn mit chäs. schmöckt genau so hässlich wie's gsi isch, aber was wetsch. bi all dem mcdonalds food simer mittlerwilä nümä wählerisch gsi.

bim 2. doppelstöcker hämer denn voll is schwarze troffä mit em guide (sprichwörtlich...haha) und das isch denn um einiges amüsanter gsi. und gottseidank hät denn s'wetter au verhebt, wil dr ösi hätti denn zimli id schissi griffä. und das nur, wil er sich konsequent gweigeret hät, irgend e billigi rägä-jagge z'chaufe.

ja, das wär's denn au scho wieder gsi und so hämer üs denn am obed schweren herzens wieder richg flughafä ufgmacht. zrugg id provinz, zrugg id langwili. händ sich so vili dänggt, aber nid all, nei, de ösi, isch nid ungern zrugg gangä. "boah, des is' viu zu kolt. do hobi liaba weniga los, döfüä wöama. do konnst jo net mol an pool liign..." ja, d'gschmäcker sind verschiidä...

dr rückflug isch denn wider erwartä rächt amüsant gsi, wil die beide stewardessä glaub grad z'erscht mol en flug begleited händ oder so. d'aared hät folgendermassä agfangä "this is flight seventy-four...thirdy...somewhat, i don't know. but all you gotta know is, we're flyin' to atlanta..." und isch denn so wiiter gangä "we're now goin' to show you the rescue-procedure, since it's been slightly changed since the 60ies, y'a know..." d'lacher händ's uf all fäll uf ihrer siitä gha, aber wenn denn do würkli en emergency occured wär, wär mer denn nid sicher gsi, öb die black stewardess ihren booty gnueg schnell dur'd sitzreihä hät mögä bugsierä. gottseidank isch nüt passiert. gepäck hämer au kei verlorä und dr mietgöppel isch au no det gsi, womerne am dunschtig higschtellt gha händ. erfolg also uf dr ganze linie. bis uf dass mer ez halt wieder uf milledgeville zrugg cho sind...;)

also, ich chan chicago nur empfehlä, s'isch meh als nur ei reis wert!

zur allgemeine erheiterig do unde no dr commander ösi, wo sich nach sinerä füürtaufi in chicago ernschthaft überleit, vilicht als georgia military college z'wächsle.