am samstig sind dr hobi, heidi und ich s'2. letschts mol elei underwägs gsi und händ üs vo santa barbara us richtig los angeles ufgmacht zum dr hengi am flughafä abholä. underwegs hämer halt in malibu beach und santa monica gmacht.
dr mitch buchannan isch zwar nid grad on duty gsi, aber wenigschtens isch sin wältberüehmtä gälbe göppel ar malibu beach parkt gsi, sodass mer wenigschtens säb händ chönä fötelä. dr steff hät denn umes hoor no en schwumm im ozean gmacht und bi mindeschtens 20 grad lufttemperatur hät mer das au locker chönä, taktisch-strategischi entscheidigä händen denn aber drvo abghalte. sprich, er hät sich nid welä uf'd äscht useloh mit sine türkis-farbene underhosä, wo vo de lifeguards no als solchi hätted erkennt werdä chönä...
x-uf alli fäll. irgendwenn simer denn wiiter uf santa monica, händ det en erschte iidruck drvo übercho, wie gross los angeles sälber wahrschindli wird si, und händ üs mit strosseshows, emä atemberaubende aquariumsbsuech (guet, für 2 dollar chamer nid würkli meh als 30 cm langi hai erwartä...) und de beide football-halbfinals d'ziit vertriibe. übernachtet worde isch schliesslich i eim vo de zahlriche spanierviertel vo los angeles, in el monte. mit üsernä sensationelle chartä (eini wo vo nevada über orgegon bis ebä zu californie und mexiko so zimli alles druf hät, en anderi, wo zwar e detailchartä vo l.a. isch, aber anschinend gmacht wordä isch, wo ersch öppä 50% vo de schtrosse gschtande sind...) isch's eigentlich es wunder gsi, dassmer vor dr dämmerig no det acho sind. mol drvo abgseh, dassmer voll id rushhour cho sind, und dankem heidegger sinerä durchlauferhitzig öppä jedi 3. usfahrt händ müessä zwüschestöpps mache.
wie au immer. dr suntig isch mit muscle beach und venice beach au no irgendwie über d'runde broocht wordä, und am obed hämer üs schliesslich ufgmacht, zum dr hengi am lax abzholä. de isch tatsächlich praktisch unverschpötet acho, und wil mir gnueg früeh acho sind, hämer nachre churze rundreis bi allne terminals denn doch no üssers grossi willkommens-halali abhaltä chönä. dr hengi hät vo jet-lag öppä so wenig gschpürt wie mir do vom winter und so simer denn grad mol richtig downtown l.a. zum üs en willkommens-drink gönne. die erscht-bescht bar isch denn allerdings au so zimli die einzig gsi, womer im gschätzte umkreis vo 10 blöcks händ chönä usmache, und so simer denn unverrichteter dinge halt wieder i üsers mexikaner-näscht zrugg.
am mäntig hämer üs denn so richtig die l.a.-dröhnung geh, mit hollywood, sunset boulevard, walk of fame, kodak theatre, beverly hills, rodeo drive und was weiss ich no alles. s'wätter hät leider nid allzu guet mitgschpilt, und nachdem dr steff sis rolleagebot als neuiä freddy krueger dankend abglehnt gha hät, simer vorem räge is wachsfigure-kabinett gflüchtet. das isch meh oder weniger guet gsi, obwohl d'hale berry zum bischpil eher ähnlichkeit mit dr michelin calmy-rey gha hät, als mit sich sälber. aber für d'unterhaltig hät's glanget.
am rodeo drive häts e huufä dekadenz z'gseh gäh, so vil luxus-chärre nachenand hät wahrschindli no chum eine vo üs gseh gha und vo de chanel und dior läde am schtrosserand ganz z'schwiige.
s'obedprogramm isch denn ebefalls am sunset strip abghalte worde und nachdem dr steff hobi innert chürzeschter ziit e usgangslocation usgmacht gha hät, hämer üs denn churzi ziit schpöter eher überrascht imne rock-konzert im sogenannte key club wiedergfunde. überraschenderwiis isch d'vorband besser gsi als dr main act, aber das chönt au dra gläge ha, dass letschteri (die wältbekannt band "metal skool"...haha) bis uf'd liedasaage nid vil live z'büüte gha händ...
trotz eher schall und rauch isch dr obed nid schlächt gsi, und nachre wiiterä nacht bi üserem ungschlagne lieblingsvolk i de usa, de inder, simer am zischtig ready gsi für üseri beach tour. vor mannhattan isches über d'hermosa und d'redondo schliesslich ad long beach. fazit: eher unspektakulär und vilicht doch eher im summer z'empfehlä. genau so wie venice beach, womer am obed vor üserem rock-konzert bsuech no uscheckt händ. also wär nid grad en bricht über die soziale abgründ vo amerika schribe oder fotne vo tuusige vo penner am strand schüsse wil, wird wohl eher weniger fündig.
am ehnschte no in long beach. an alli hip hop fans: dr snoop dogg isch denn überhaupt nid im ghetto vo l.a. ufgwachse, long beach isch fascht so jet-set wie beverly hills...und drum verschtuunts au nid, dass de no dr luxus-dampfer queen mary vor anker liit.
zum üs die amerikanisch kultur no es bizli nöcher z'bringe hämer üs am obed schliesslich no s'iishockey game los angels kings gäge d'detroit red wings zu gemüte gfüehrt. vilicht wäri e konsultation vo de aktuelle ranglischte vorem schpiil no hilfrich gsi. s'heimteam hät nämli tatsächlich gnau so gschpilt, wiemer das vom schlächtischte team vor ganze liga halt so erwartä wür und eher unspektakulär 3:0 uf dr sack übercho. s'publikum isch öppä so frenetisch gsi, wie s'altersheim riva bim nochmittagskaffi und würkli abgange isches nid.
jä nu. geschter hämer eher no d'2. wahl sehenswürdigkeitä abklapperet, vo irgenderä pyramide in long beach über's chinatown viertel, wo im verglich zu dem in san francisco allerings eher en china-weiler gsi wär. allgemein isches aber rächt abgfuckter gsi, als zum bischpil dr jade palascht in waleschtadt, sodass mer denn bald mol wiiter sind. und zwar zum david beckham. oder wenigschtens zu sim team. de los angeles galaxy. oder besser gseit wenigschtens zum stadion. wil weder dr beckham no sis team sind am kicke gsi und so hämer halt numä s'home depot center gseh. immerhin.
hüt gohts nomol zrugg nach santa barbara wil det d'college night hoffentlich wieder andersch abgoht. und drnoh stoht denn no six flags und bald mol las vegas ufem programm. s'schlussfazit vo los angeles: büütet nid ganz so vil wie immer verschprochä wird. händ amel mir s'gfühl gha. aber vilicht isch das au andersch, wemmer würkli riich und schön isch und wie'd paris i jedä club gratis iiglade wird und sich am rodeo drive d'chleider eifach grad iipacke loh chan. we'll never know. also zimli sicher...;)
noch en chline gheimtipp für all wo dr blog erscht sitem januar läsed. die verschwummenä bilder, wo unde dra amel sonen pfiil händ, sind nid würkli verschwumme, sondern videos...wemmer uf dr pfil druggt, bewegt sich d'bilder...
zum üs die amerikanisch kultur no es bizli nöcher z'bringe hämer üs am obed schliesslich no s'iishockey game los angels kings gäge d'detroit red wings zu gemüte gfüehrt. vilicht wäri e konsultation vo de aktuelle ranglischte vorem schpiil no hilfrich gsi. s'heimteam hät nämli tatsächlich gnau so gschpilt, wiemer das vom schlächtischte team vor ganze liga halt so erwartä wür und eher unspektakulär 3:0 uf dr sack übercho. s'publikum isch öppä so frenetisch gsi, wie s'altersheim riva bim nochmittagskaffi und würkli abgange isches nid.
jä nu. geschter hämer eher no d'2. wahl sehenswürdigkeitä abklapperet, vo irgenderä pyramide in long beach über's chinatown viertel, wo im verglich zu dem in san francisco allerings eher en china-weiler gsi wär. allgemein isches aber rächt abgfuckter gsi, als zum bischpil dr jade palascht in waleschtadt, sodass mer denn bald mol wiiter sind. und zwar zum david beckham. oder wenigschtens zu sim team. de los angeles galaxy. oder besser gseit wenigschtens zum stadion. wil weder dr beckham no sis team sind am kicke gsi und so hämer halt numä s'home depot center gseh. immerhin.
hüt gohts nomol zrugg nach santa barbara wil det d'college night hoffentlich wieder andersch abgoht. und drnoh stoht denn no six flags und bald mol las vegas ufem programm. s'schlussfazit vo los angeles: büütet nid ganz so vil wie immer verschprochä wird. händ amel mir s'gfühl gha. aber vilicht isch das au andersch, wemmer würkli riich und schön isch und wie'd paris i jedä club gratis iiglade wird und sich am rodeo drive d'chleider eifach grad iipacke loh chan. we'll never know. also zimli sicher...;)
noch en chline gheimtipp für all wo dr blog erscht sitem januar läsed. die verschwummenä bilder, wo unde dra amel sonen pfiil händ, sind nid würkli verschwumme, sondern videos...wemmer uf dr pfil druggt, bewegt sich d'bilder...alrighty-then! bis bald mol!
Keine Kommentare:
Kommentar veröffentlichen