dur d'pampa zrugg ad küschte

und schwups! scho sind zwei wuchä vo üserem trip ume und je länger dasses goht, desto wärmer und besser wirds! geschter simer in santa barbara bi sicher mindeschtens 20 grad umegwanderet und richtig süde schiint i de cities au chli meh los z'sii, als im norde vo kalifornie. aber z'erscht mol dr reihä no.

vo bakersfield us hämer üs wieder richtig küschte ufgmacht. nid ganz dr glich wäg wiemer cho sind, aber au wieder durd sierra madre. allerdings hät sich d'abfahrt denn fascht no müessä verschobä werdä. dr "weisse riese megaperls" roger heidegger hät ir gröschte wäschaktion vor gschicht vom vagabond inn in bakersfield nämli grad mol churz sin ganze huusroot, gwäsche. us furcht drvor, dass dr trochner d'liibli no chliiner, alses scho sind hät chönä mäche, sind nach öppä gschätzte 5 sütt wösch, denn grad mol all t-shirt irgendwo im zimmer usbreitet wordä, zum lufttröchne. gnützt häts uf all fäll nid vil, aber do häts nüt geh, mir händ müessä wiiter. d'sierra madre hät sich denn ei mol meh als eher langwilig und aschtrengend usegschtellt und hätti de roger mcrae d'schtrecki mit sim fahrstil nid schneller als sus absolviert, wäre mer wahrschindli hüt no ir pampa. "hoffentli hät de toyota karbon-bremsä", isch denn nur am fahrer sis s'fazit gsi, nachdem mer in san luis obispo acho sind. am navigator und passagier ufem rücksitz sis isch eher "würg" gsi. whatever.

in san luis obispo hät denn z'erscht mol dr hunger gschillt werdä müessä. do isch's natürli grad gläge cho, dassmer per zuefall anes all you can eat china buffet für 8 dolla herägloffä sind. as good as it gets, sägi do nur. san luis obispo als städtli wär im grund gnoh nid schlächt gsi, eifach vil z'tüür betreffend hotel. und nach zwei täg meer-abschtinenz isch d'entscheidig denn au nid schwer gfalle zrugg ad küschte nach pismo beach z'fahre.

nach zwei vergebliche versüech, bi - ei mol meh - indische motel-"manager" es zimmer imne agmessenä priisliche rahme überzcho, simer denn im blue seal inn fündig worde. gäbig grad au no, dass die hütte nur öppä 2 blöck vom meer entfernt gsi isch. so hämer's - trotz dem, dass nomol öppä e halbschtund zur uslag vo de no immer füechte t-shirts vergangä isch - denn doch no rächtzitig zum sunneuntergang ad beach gschafft.

und de isch eimol meh, wie'd amis säge würded "amazing" gsi. au nachem sunset häts denn no öppis z'gseh geh. grad näbedem pier händ sich nämli paar nachwuchs-surfer meh oder weniger erfolgriich dra versuecht, die richtige waves z'catche, und ab und zue isch das au glunge. nid grad z'spektakel wo sich dr steff erhofft hät ("z'geilscht wär, wenn ez do en hai cho wür und eine, zwei vo denä verruume würd..."), aber immerhin.

um üs mit de locals z'vertraut mache, simer denn wieder mol ine bar, und händ üs mol so richtig über sport ufkläre loh. irgenden mittdriisger mit meh oder weniger gravierendem alkoholproblem (nid ganz so schlimm wie de typ in santa cruz) hät üs ez alles, womer bezüglich baseball, football, beachvolleyball, form und längi vo surfbretter, ifluss vom college football uf'd nba und so wiiter verzellt. teilwiis no interessant gsi. no vil interessanter sind allerdings d'reisetyps gsi, woner üs mit uf dr wäg geh hät. so hämer denn zum bischpil d'schtadt "surf", wo uf üserä kalifornierä-charte als stadt direkt ar küschte markiert gsi isch, denn churzerhand vom reiseplan gschtriche. militär-basis isch jo guet und rächt, aber do hämer denn im wk no gnueg drvo...

im prinzip hättemer jo eigentlich wellä ufem chürzischte wäg nach santa barbara vo pismo beach us. schliesslich isch gemäss mehrere ami-ussage det "where the party's at". spontan wiemer sind, simer nach churze abschtecher ines wiiters outlet und hamschterchäuf vom steff, denn aber nid nach santa barbara, sondern solvang. das mol nid wäge irgenderä missrootenä navigations-leischtig, sondern absichtlich...

solvang isch afangs 20. jahrhundert vo irgend es paar däne gründet wordä, und die ganz schtadt gseht würkli meh skandinavisch, denn amerikanisch us. guet, ich bin no nie z'dänemark gsi, aber uf all fäll gsehts nid amerikanisch us. agschribe isch au alles uf dänisch (oder ebä amel nid englisch) und die netti dame vom visitor center, wo vermuetli bir gründig vor schtadt scho öppä 30i gsi isch, hät au en dänische akzent gha. die hät üs denn, nachdem si üs d'proschpekt des langen und breiten im schnägge-tempo erklärt hät, au agroote, mer sölled lieber out of town goh, wemmer e billigi bleibe für'd nacht sueched. der rot hämer denn natürli befolgt, und sind gschtärkt mit echter danish bakery uf iz nochbuurdorf in buellton.

am obed hämer dänggt, steppi sicher dr bär in solvang, aber eimol meh weit gefehlt. user in öppä 30 wiideguschtations-spelunke, wird det glaub niened öppis anders usgschänggt, und so isch's denn bim coci-light zum z'nacht bliibe.

zu allem unheil hät denn au no z'china buffet vom vortag bi de einte vo üs afange würkig zeigä, und nach eis, zwei sitzige, hät schliesslich d'schissi i üserem bombe-motel-zimmer kapituliert. mit vereintä chräft und iisatz vo hoch-technologisiertä mittel hät schliesslich aber au das problem chönä behobä werdä. und für unterhaltig a dem obed isch drzue herä grad au no gsorgt gsi.

am dunschtig isch's denn entli so wiit gsi, und mer sind tatsächlich uf santa barbara. nachme churze usfluug as pier simer no d'university of california in santa barbara (uscb) go beschtuune. scho chli grösser als s'college wo ich gsi bin. aber wenn's mer ez ar uscb no en schtudieplatz aabote hätted, hät mi ez glaub au no überredä loh, es wiiters semeschter ir usa z'schtudierä. direkt am meer dr chopf z'rüüchä loh, isch schliesslich nid soooo schlächt.

wil d'hotels in santa barbara priislich au eher ar obergrenzä gsi sind, hämer üs denn no drzue entschlossä, d'nacht i üserem toyota z'verbriinge. dr obed hät mit kino und thailändischem essä agfange, und irgendwenn nach verschiidenä bars für einigi vo üs früehner oder schpöter wieder i üserä rollendä unterkunft gändet. nach früehsport isch uf all fäll denn keinem vo üs z'muetä gsi, und so isch denn am fritig au z'erscht mol e rundi schlofä imne richtige bett imne motel agseit gsi. dr obed isch mit erä wiiterä rundi kino (cloverfield: achtung seechrankheitspotential ufgrund vor kamerafüehrig...) und käffele sowie diskussione über gott und die welt usklungä wordä. a derä schtell no paar vo de wahnsinnig hochstehende diskussions-theme: wieso heisst bio-straht nur no strath?, was bewirkt teebaum-öl bir pickelbekämpfig?, wievil frauä dörfed italienischi bau-arbeiter ha?, und so wiiter und so fort.

tja, reise-berichtmässig wär's das ez gsi. us keinem alass startemer i dem blog ez zuesätzlich no miterä neuiä aktion. nach erfolgriiche seriä wie "dr sandro in...(indien, afrika usw.)" und "das leben des ösi", startet ez d'suechbildaktion "wo ist steffi/sandi?". s'erschti bild i üserä hoffentlich bald beliebte serie gsehnder unde. lösigsvorschläg chönd als kommentär postet oder sus ufem übliche poschtwäg an glückpost-bilderrätsel, dufourstrasse 49, 8008 zürich, iigsandt werdä. viel schpass!

reisemässig gohts hüt ez wiiter zur heilige monika und am suntig denn endlich uf los angeles. det wird denn dr hengi am flughafe abgholt, sodass d'fantastic four gemeinsam uf d'pischte chönd. see you!