river-rafting uf baptistisch

ave maria, voll der gnade!

sola, aufgrund vermehrter reklamationen aus der heimat, sehe ich mich gezwungen, den blog mal wieder auf schweizer-deutsch zu schreiben. back to the roots und so...mal schaun', wie ich das in zukunft so mache, ob ich abwechselnd mal so, mal so berichte oder nur noch schweizer-deutsch. we'll see. also, grad mol vorneweg: vil isch die wuchä nid würkli gloffä. das isch zum eintä mol dra gläge, dass schlächt wätter gsi isch und mr jo no bis am mitwuch labor day holidays gha händ. und zum zweitä, wil do in milledgeville unter de internationale schtudentä d'air-condition-süüch usbrochä isch und drum all nid so fit gsi sind. aber das chunt glaub scho wieder.

chrankheit hi oder her. man muss die feste feiern, wie sie fallen. und will am ösi sin 22. geburtstag genau uf zischtig gfallä isch, hät de dänn halt au ordentlich gfiiret werdä müessä. leider isch's do in milledgeville halt aber so, dass zwar en huufä clubs under dr wuchä offä händ, i denä ine denn aber öppä sovil los isch, wie ar uni i de semeschterferiä. schprich wenig bis gar nüt. neverthelesse hämer denn schlussendlich e karaoke-bar gfundä, wo en einigermassä würdigä rahme dargschtellt hät und so isch denn de geburtstag au no gfiiret wordä. dr philipp aka stromberg und ich sind wieder in hochschtimmig gsi und hätted eigentlich no zäme mit em dorftrottel, wo'd tön so guet trifft, wie dr fc waleschtadt d'goal, welä go performe. und zwar underem band-namä "john and the foreigners". irgendwie simer am bar-bsitzer denn aber glaub nid so sympathisch gsi und uf dr lischte immer chli witer abe grutscht.

so nicht! hämer üs dänggt, und händ's denn irgendwenn mol ernüechteret aber trotzdem nümä ganz nüechtern heizupft. zum thema trunkäheit no chlini info: im letschtä post hani jo gschribä gha vom bsoffene unter-21-jährige. das choschtet denn übrigens en rächte batzä gäld, wenn eim d'police verwütscht. am jonas sin mitbewohner isch dracho und de isch ez sage und schreibe um 942 dollar!!!! erliechteret. das sind mindeschtens 250 schtangä! proscht...

wäg dr air-condition süüch, wo do um sich griift, isch dänn die ganz wuchä nümä vil agschtandä näbscht uni, bis uf am mitwuch chli tschuttä näbed öppä 50 football-schpieler, wo sich i eim iifer gägesiitig d'chöpf igrännt händ. ah, doch. am dunschtig isch denn no füüralarm gsi bi üs ir residence hall. z'erscht hani dänggt, ja tammi, was hani denn ez wieder druggt. wil do git's so emergency-buttons, wo sensationellerwis genau näbedem bett montiert sind oder näbed dr chaschtätüür. aber schlussendlich hät sich denn usegschtellt, dasses gar nid ich gsi bin, sondern en tescht-alarm. sehr luschtig. uf all fäll hämer denn dörfe dur 7000 gäng vor hall irre, bis mer denn ufem "schnellschtä" weg evakuiert wordä sind. seeeehhhr effizient. jaja.

am dunschtig isch denn endlich s'grossi highlight vor wuchä agschtande: z'pre-meeting für's river rafte. und river rafte nid nur eifach so mit paar internationale students zäme, nei, zäme mitem baptist church club. ja, wenn das mol nid verheissigsvolli vorzeichä gsi sind. dass das ganzi denn vermuetlich chli andersch ablaufä wird, als ohni church, hät sich denn zimli bald mol zeigt. guet, dass all mol uuuuuuuuuuuuu nett gsi sind, dass hani no chönä verträge.

aber dasses denn a dem meeting ufzmol gheissä hät "no alcohol" und "no girls in boys' rooms und umgekehrt" isch mer denn scho chli suschpekt vorcho. so bizli wie firmigs-lager. anyway, für 60 dollar mit transport, hotel und rafte, chasch das no uf dich neh, händ sich denn die meischtä dänggt...solang mer nid grad die ganz fahrt rosächranz bätä müend. und so simer denn am fritigmittag mol zu dem checkpoint, womer näbscht de anderä internationals denn no vili anderi uuuuuuuu netti lüüt känneglernt händ. gottseidank hät sich denn ergeh, dass dr ösi, dr jonas, stromberg, ich und zwei spanierinne i ein van händ chönä, sodass d'fahrt no einigermassä erträglich wordä isch. 4 schtund hät de ganzi gschpass uf north carolina duuret und womer denn bim dinner gfroget händ, was ez am obed no so ufem programm schtoht, händ sich denn die eintä scho gfroget, öb das mit denä 60 dollar würkli sone gueti inveschtition gsi isch.

d'antwort: "aaah, probably we're going to the church after dinner..." hät bi üserem teil vor reisegruppä uf jedä fall nid grad begeischterigsschtürm usglöst. vilicht no schnell öppis zum dinner. das hämer bim long john silver "gnossä". au sehr e interessanti gaschtronomie-stätte, woni ez minimum mit emnä halbä zackä vomne gault-millau schtern uszeichnä würd. im prinzip chönder eu es x-beliebigs nahrigsmittel usdängge, wo ganz eifach für öppä 10 minutä id friteuse ghauä wird. drum hät's denn au nid gross erschtunt, dass d'chicken gena glich usgseh händ, wie'd fisch...es wunder eigentlich, dass dr salat nid au no fritiert gsi isch...au no e chlini anekdotä wert: in north carolina, georgia, tennessee und all denä anderä umliegendä schtaate befindemer üs jo im bible-belt. alles sehr gläubig do umenand. und drum gitses denn halt au mol, dassmer es churzes tisch-gebät iileit, bevor g'ässe wird. und sägs nur imne fast-food-restaurant wie im long john silver. so gesehen binerä 7 chöpfigä familie mit chind und chegel. nachem bätä isch's denn aber scho gsi mit dr sittlichkeit, wil d'grossmuetter hät denn frischfröhlich am tisch afangä ihri manicure mitem nagelchlupper z'vollfüehrä. mmmmmhhh, jammi!

wie gseit, nache iicheckä im best western hotel, wo drvor vermuetli no 30 mol gsägnet wordä isch, simer denn tatsächlich i sone begägnigsschtettä, womer anderi baptischte-clubs vo colleges usem bible-belt und wiiteri anderi internationals troffä händ. denn hät's so gaaaaaaaaaannnnzz, wahnsinnig luschtigi kännelern-schpili geh, und nachdem d'1:1 live-kopie (foti folgt hoffentlich no) vom ned flander's denn e als alltagsgschicht tarnti jesus-predigt zum beschtä geh gha hät, sind denn mir ar reihä gsi. und zwar hätemer söllä gaaaaannnnnzzz luschtigi internationali lieder zum singä performä. ich weiss au nid, wieso mer das immer passiert, aber wahrschindli hätti z'alaska oder im kongo chönä es ustuuschsemeschter machä, aber irgendwie grooti immer a so lüüt herä, wo genau so chintsch sind, wie ich, oder sogar no chintscher. success genau so muesses si! und drum isch sich die dütsch-öschtrichisch-schwiizer-allianz denn au nid z'schad gsi, de pizza-hut-song zum beschtä z'geh. meh applaus als dr ned fanders hämer uf all fäll übercho. wil's das für baptistischi begriff denn au scho gsi isch mit dr party simer denn halt wohl oder übel zrugg is hotel und händ det ohni frauä ufem zimmer d'nacht verbrocht. alkohol isch au kei im schpiel gsi. und drü vater-unser hani au no gäg dr himmel gsandt...verschprochä;)

ja, am nächschte tag isch's denn sowiit gsi und wil morgeschtund bekanntlich gold im mund hät, simer denn au scho am viertel vor achti los. gottseidank isch das alles öppä so guet organisiert gsi, wie's schwiizer militär und drum hämer nachdr akunft bi denä river rafters (http://www.riverrunnersretreat.com/) so am 9i denn z'erscht mol gwartet bis am 11i. die firma isch übrigens au chli fromm aghucht gsi und drum hät's denn au nid wiiter erschtuunt, dass ir busfahrt ufä zum schtartpunkt irgendso einä am mikrophon verzellt hät, er heigi es guets gfühl im herz, dass hüt alles guet gächi und er heigi jesus hüt morgä scho für de tag danket. mann soll den tag nie vor dem abend loben, han ich mir denn überleit, aber de maa wird jo scho gwüsst ha, waser do prediget. ah ja, d'böötli händ denn natürli au alli so luschtigi fischli druf gha, aber nid öppä heiä oder goldfisch, sondern die, wo dr schwanz hinde nid ganz usbildet händ (http://www.richmondquakers.com/ichthys.gif). sehr gschpässig.

jedefalls isch mer denn irgendwenn tatsächlich no iz wasser. üsers boot hät sich us dr mittlerwilä guet igschpiltä german-speaking section mit dr nele, em jonas, stromberg, ösi und mir und de zwei spanierinne maria und ana zämegsetzt. leider hät's vo dem teil vom trip kei bilder geh, wil wasser und kamera vertreit sich bekanntlicherwiis jo öppä so guet wie d'baptischte mitem satan. nimmi ez mol a. allerdings muessmer au säge, dass das, wo üs do als rafting-trip verchauft wordä isch, nid vil schpannender gsi isch, als gondlä fahrä in venedig. also eher booooooooorrring! vor allem über 2 schtundä lang. luschtig isch erscht uf de letschtä 400 meter uf sonerä walzä wordä, womer us luuter unfähigkeit z'erscht es ander boot grasht händ und det denn grad mol en öppä 60 jöhrigä maa über bord isch und üs denn anschlüssend definitiv is gedächtnis vo allne guides ibrennt händ. üse dütsch kahn hät's nämli alls einzigä vo 20 boot nid gschafft, rächtzitig d'usschtigsschtell azschtüürä, und drum simer denn munter richtig wasserfall triibä. irgendwenn isch denn e rettigsleine z'flüügä cho und so simer denn schlussendlich doch no an land cho. wil mer öppä s'2. letschtä boot gsi sind, und mer üs scho am obed drvor voll zum aff gmacht gha händ, händ üs denn natürli scho all kännt, und die dütschä händ ihren ruef a dem fluss für die nächschte 5 johr jetzt zimli sicher mol wieder zementiert.

alles in allem chamer säge: trotzdem en nettä usflug gsi. au wenn nid würkli soooo adventurous. aber wenigschtens hämer nie bätä müessä. und rächt vil züügs gratis hämer au no übercho. zum bischpil es handtuech vom babptischtä club.

während insgesamt 8 schtund autofahrä gseht mer natürlich so einiges an landschaft und die gseht vor allem in north carolina rächt ähnlich us wie ir schwiiz. würklich erschtuunlichi ähnlichkeit. hät denn au der öschtriicher gmeint, wobi er dr meinig isch, d'schwiizer hüüser säged um einiges hässlicher. jaja, dr ösiuf all fäll simer am samstig obed denn alli wohl behaltä zrugg uf milledgeville cho. konvertiert isch bis ez no niemert. ich bin au no unschlüssig. mol luegä. öb's do umenand vilicht glich nochli meh action z'entdeckä git, gömer next weekend mol go uscheckä. do hämer üs ez nämli für's skydive agmuldä. hoffentlich bäted die typä vom baptischte club für üs...;)

en schönä suntig allersiits und denn en guetä schtart i die neui wuchä! peace out, bro's!