gangsters in paradise

bam bam bam! so hät's chönä tönä. vilicht. wenn de netti wesley crafton sini gun brucht hät. häter aber nid. aber e story isch's trotzdem wert gsi, dass de netti jungi herr mit gladne waffä ufem campus gländ feschtgnoh wordä isch. und mit paar messer. aber schliesslich bruucht mer das in amerika jo au. wer weiss, wenn eim plötzlich es paar indianer überfallet...uf all fäll chunt de herr crafton ez es zitli lang nümä ad uni und das isch vilicht auch nid allzu schlächt...


d'uni-ziitig isch au froh gsi, hät's wieder mol über öppis anders als z'uni-orcheschter z'brichtä geh und gschtorbe isch jo niemerd. also no alles im butter.

so, wie hät d'wuchä so usgseh. wieder nid allzu grossartig ir 1. wuchä-hälfti, bis dassi dr 1. richtig tescht han dörfä schriibä. isch nid schlächt usecho, under anderem wili au die 3 hoch-aschpruchsvollä zuesatzquestions beantworte han chönä. frog 1: "spell the last name of the professor teaching the course.", frog 2: "name the project you signed in for during the last class." frog 3 weissi ez grad nümä, aber de schwierigkeitsgrad isch uf all fäll nümä gschtiigä. ja. am mitwuch isch wieder mol international club agseit gsi und am dunschtig wie sooft wuchenend-iilütetä im capital city.

zur überraschig vo allne händ das mol au üsri asiatische kollegä dr wäg detherä gfundä, und die händ denn au nid zruggghaltä mit victory-posenä. sogar währendem tanzä. obwohl die einte denn glaub chli gschtresst gsi sind vor luuter stroboskop. vermuetli händ's dänggt, s'gäb jedes mol es föteli...;)

am fritig isch denn wältuntergangs-tag agseit gsi, amel vom wetter her. am nomitag hät no es poker-turnier stattgfundä und de öschtriicher, de stromberg und ich händ denn det grad mol zeigt, was d'europäer so für pokerfaces druf händ. also uf all fäll dr öschtriicher und ich. mir händ dr sieg a üserem tisch underenand usgmacht und letschtendlich hät denn de ösi s'glück uf sinerä sitä gha. reschpektive hät eifach vo afang a meh chips gha und drum denn eifach immer wacker erhöht, bisi nümä han chönä mithaltä. uf all fäll hät denn die taktik bim final-table nümä zogä und dr ösi hät denn völlig enttüscht dr tisch müessä de amis überloh. kommentar: "i hät meah auf zeit schpüun solln..." jaja, nochher isch mer immer schlauer. aber für eine, wo e halb schtund vor em schpilä nonid gwüsst hät, was dr unterschied zwüsched black jack und poker isch, doch nid allzuuuuu schlächt...;)

do d'europäer do nid no nur im pokerä fang d'mässlatte setzed, sondern natürli au im fuessball, sind dr jonas und ich denn die einzigä gsi, wo am fritig atanzed sind. s'wätter isch z'schlächt gsi, hät denn en schwarze, wo 3/4 schtund schpöter iitrudled isch, gmeint. und das isch denn tatsächlich dr fall gsi. innerhalb vo öppä 10 minute isch pächschwarzä himmel gsi und drum isch denn die fuessball-session zimli bald beendet gsi. wil leider vom fuessball-platz denn kein shuttle meh gfahre isch, bzw. niemert meh vom shuttle-service meh abgnoh hät, hani denn halt wohl oder übel am freund und helfer vo jedem schtudent, ar "public safety" alüütä müessä. und die händ denn nid eifach en shuttle organisiert, wo mi us dr sintfluet grettät hät, nei, die sind denn grad sälber mitme polizei-auto cho, zum dr sandro abholä. das isch no service. und no vil meh service isch denn natürli gsi, wo die netti frau sheriff, wie si dr ösi vo jetzt a nennt, usgschtiigä isch, zum mir d'türä öffne. wil jedä wo polizei-auto kännt, weiss jo, dass mer d'türä ufem rücksitz jo eher schlächt sälber uftue cha. ja. demfal wieder öppis zum abhoggä uf dr lischtä "things to do": "auf der rückbank eines polizeiwagens fahren"...

am samstig isch denn sensationells wätter gsi, sodass s'highlight vor wuchä, nämli skydive eigentlich nur guet hät chönä usecho. leider gottes, schiint aber d'organisation ir usa tatsach nid grad vil andersch z'sii, als im schwiizer militär und drum hämer - wie chönts au andersch si - wieder mol chli dörfä warte. vom ganze papierkram usfülle, bis zum schprung gschlagni 5 schtund. und ehrlich gseit, muessi säge, isch's das nid ganz wert gsi. klar isches luschtig, es riisä-schwuls kombi azüchä z'dörfä und no e vil behindereteri brülä und drmit ufem hangar umezwandlä. klar isches luschtig, wemmer mit me instructor, wo a dem tag scho 14 schprüng gmacht hät, und ganz toll ufgleit isch, wiler mit dem typ, woner vorher a sich draghängt gha hät, grad e riisä bruchlandig baut hät, flüügä dörf. klar isches witzig, isch de typ au bim iischtigä in flüger no überzügt, dassmer us schwedä chunt. klar isches uuuuu bequem, wenn eim es halbs synchronschpringer-team ufem rächte scheichä sitzt im flüger. und sicher isches lässig, wemmer denn vo 14'000 feet mol us derä chischtä usegumpet. aber vil andersch als bi 160 km/h uf dr autobahn dr chopf zum fänschter usehebä und denn wie nachem gondläfahrä druckusgliich z'machä, isch's ez würkli nid. wil passiere chan bim tandemschpringä ez glaub würkli nid dr huufä.


usser mer schtellt sich so a wie dr single-jumper nach üs, wo's gschafft hät, dass sich sin notschirm im eigentlichä schirm verhedderät hät. aber gottseidank hät sonen tolle jumper jo immer no es mässer drbi, womer denn dr eint schirm razz-fazz abhauä chan. dumm nur, wemmer denn dr falsch abhaut und dr zämekrugelät halt immer no a eim drahängt. aber gottseidank gits jo no reserveschirm und so isch de schpassmacher denn doch no heil uf d'erdä zruggcho. au wenn en momänt lang denn grad es heilloses durenand ufem flughafä gherrscht hät.

min jumper hät denn zwar mini lande-qualitäte globt und gmeint, momol, do merkmer scho, dassi mol en tandemschprung gmach heig, aber für de tag häter denn au gnueg gha. er heig sich bim crash mitem big guy vorher glaub dr chnöchel brochä, und drum lässers für hüt glaub...uf all fäll ischer nochher denn glich nomol gschprungä. so wild hät's also nid chönä si...;)

es video hani übrigens keis gmacht. das hätti 90 dollar koschtet und wenn's so usecho wär, wie bimne american girl, wo mit üs mitcho isch, denn hätti nid mol 5 drfür zahlt. usserd em schprung usem flüger hätmer grad so guet chönä e schneeflächi filmä und was si gseit hät, hät mer nid würkli verschtandä. und ez nid wäge englisch oder so, für all die schpassvögel, wo sich das ez scho wieder überleit händ...;) ja, wer übrigens uf's bild obe klickt chan au no meh als nur blau unden grüenä schirm erkennä. das wär denn ich. also de vorne. mit de churzä hoor...

zu guter letzt no öppis us dr abteilig "hushalt". nachdemi bereits usegfundä han, dassmer liibli vo inä nach usä dreihä sött, drmits bim wäschä nid fuslet, wird mi ez i de nächschte paar wuchä mitem thema "zämeleggä" usenand setzä. eigentlich hani do e umfrog welä schtarte, nach welem muschter, dassi vo de obigä variante vorgoh söll. min favorit isch jo ganz klar unde links...aber vilicht findi das au sälber no ussä. irgendwenn vilicht...;)

ja, e wiiteri wuchä durä mit e whole lot of fun. wenn au nümä ganz soooo vil wie i de erschtä wuchä. öb fun hi oder her, wichtig isch, dassmer friedlich isch. händ sich au die guetä lüüt vo milledgeville dänkt und drum grad mol es entschprechendes dänkmol gsetzt. luschtig isch, das rächts vom peace-dänkmol immer öppä 4 polizeiwäge warted, zum au jo drfür z'sorgä, dass dr friidä au ighaltä wird. vilicht warteds aber au nur druf, bises mich wieder irgendwo go abholä chönd, wenn's mol rägnet...)

i dem sinn: gueti wuchä und suuber bliibä!...;)