mozarella und d'marines

so, ez isches also so wiit. dr alltag isch iikehrt. aaaaaaaaaahhhhhh. aber was wetsch, früehner oder schpöter hät's jo müessä sowiit cho. highlights hät's i derä wuchä nid grad vil geh. 2 papers, woni ha dörfä abgeh, und 3 prüefigä woni für nächscht wuchä han dörfä lernä. nice...dr einzig troscht isch, das s'schtudierä ir schwiiz jo au wieder agfangä hät.

näbsch uni isch dr höhepunkt vor wuchä drum einzig gsi, dass ir cafeteria s'salatbuffet um mozarella erwiiteret wordä isch. sensationell. sus isch ufem campus au nid würkli vil los gsi. d'zeugä jehovas händ am mittwoch chli werbig gmacht und wacker biblä verteilt, aber komischerwiis händ die meischtä amerikaner gseit: "sorry, already got one...". und händ drbi nid mol usgseh, wie wenn ich das amel säge und denn amel gar keini han. muess vermuetli dra gläge ha, dasses tatsächlich scho alli eini gha händ. kei wunder im bible belt. dr ösi und ich händ denn trotzdem eini gnoh, wil mer weiss jo nie...

am dunschtig sind denn au no d'marines ufem campus am schtart gsi und händ d'werbätrommlä grüehrt. aber trotz mim neuiä hoorschnitt und dr stolzä haltig bim verbi promenierä bini au det nid i die änger uswahl cho. guet, ich mein' was hetted die säbe type ir blauä uniform scho no welä biibringä...? wer mitem tremp s'militär gmacht hät, isch schliesslich für all chrieg gwappnet...;) usserdem, haued's eim bir army und de marines glaub au no öppä über's ohr. einä vom international club isch bi dem verein drbi gsi und hät ageh, er welli uf san antonio oder hawaii id usbildig, wil das chamer anschinend wähle. er hät denn aber d'arschchartä zogä und hät 1 1/2 johr uf alaska chönä go flüüger-putzä. schönä gsi...nachdem die misslich wuchä denn am dunschtig endlich, endlich mol es ändi gfundä hät, hät's natürli wieder nur no eis geh...(siehe video...)

wie immer isch's warm-up im bobcat-village abghaltä wordä, das mol bim stromberg und mittlerwilä trauet sich näbscht de japaner (siehe letschtä blog-post) au anderi asiatischi völker under d'party-crowd. das mol i üserä beliebtä seriä: sandro in indien und bangladesh. wer rotä wil, welä vo denä nettä herrä und dame do unde vo wo isch, dörf das gern. ich han kei ahnig...

nachem warm-up isch's eimol meh - wie chönts au andersch si - is capital city. allerdings leggemer do ez denn mol e pausä i, wil nach öppä 5 mol ununterbrochenä dunschtigs-bsüech, hämer usegfundä, dasses das nid ganz si chan. anstatt "let's meet at 12", chöntmer grad so guet säge "ok, see u when rihanna's played". mich frogts für was, dass die det en dj händ...jedes mol genau dr glich song ablauf...und d'lieder werded wahrschindli drum au nid würkli besser...d'lüüt au nid. wiiter unde übrigens e sehr glungni imitation vor chrage-hochschtell-hämp-id-hosä-schteck-fraktion, vollfüehrt dur dr jonas und mich. so laufet d'amis im usgang umä. chunt das irgendöpperem vonerä personegruppä us dr schwiiz bekannt vor...?

ja, das wär's denn gsi für dr dunschtig. zu allem herä hämer mittlerwilä au no usegfundä, dass s'light bier nid öppä eifach weniger alkohol dine hät, sondern im land vor fettliibigkeit ganz eifach weniger dick macht. also weniger kalorie hät...das hät denn natürlich so einiges erklärt...aber wer zur höll drinkt bier und macht sich gedanggä über s'fett werdä? mir uf all fäll nid. aber imne land, wo luut campus-ziitig 10 prozent vo de wiiblichä studentine diät-pillä nehmed, vermuetli halt scho es paar lüüt...anyway.

am fritig händ's denn ufem campus no "pirates of the caribbean 3" zeigt. pizza, popcorn, chips und alles eimol meh for free...! leider gottes isch nach öppä dr hälfti vo dem tollä film denn aber einä vo de speaker hops gangä und mit permanentäm ruschä isch's denn nümä soooo geil gsi. drum händ's dr ösi und ich denn au hei zupft, zum go billiard schpilä. und tadaradaaaa, d'schwiiz hät d'gunscht vor schtund gnützt und öschtriich drümol in folg gschlagä, womit jetzt ändlich d'füehrig im semeschter-cup übernheh hät werdä chönä. success. scho verrugt, ab was für sachä ich mich fang freuä mues do...

nachdem denn dr samstig sage und schreibe mit lernä verbrocht wordä isch, isch's am obed denn bir nele undem jonas sportlich wiitergangä. d'schwiiz hät det nach zwei billiard-niederlagä gäg dütschland mitme 10:0 kontersieg im kicker d'ehr wieder chönä herschtellä und dankre sehr ufschlussriichä sändig, wüssemer ez au, dass body-double de "sexiest job in hollywood" isch. im amerikanische fernseh lernt mer würkli no öppis für's läbe.

wie weiss eigentlich niemer meh so gnau, aber irgendwie sind dr jonas und ich do ar uni no is international soccer-team inegrutscht. übrigens tschüttelä heisst bi de amis ohni scheiss "foosball". sehr luschtig. aber zrugg zum echtä soccer, do hämer ez am suntig z'erscht mol trainiert und fazit: es isch heiss gsi. verdammt heiss. während dr ösi locker am pool bi üs ufem campus ghangä isch, händ dr jonas und ich uf irgendme acker näbscht afrikanische ballkünschtler und eher weniger versiertä amerikaner abgrackeret. wie mer do unde guet gseh chan, isch kein meter verschänkt wordä und wahrschindli gömer do ez öppä...

sofern mer üs nid vorher gägesiitig z'tod zweikämpfed, fangt nämli im oktober d'liga a und dass dörft denn no luschtig werdä. die anderä teams sind nämli zum bischpil vom military college oder vo de sororities.

wie mer gseht, würd dr jonas und ich vil besser es sturmduo abgeh, als uf dr position z'schpilä, wo üs dr trinidad und toganisch schpielertrainer igsetzt hät. aber vilicht wird üsers talent jo no entdeckt. und bi de schueh bestoht sicher au no potential: üsri 17 dollar-latschät vom wal-mart händ sich nach 90 minute nämli eher wie gummi-schtiefel agfühlt...

ja, was isch sus no glaufä? wie gseit, nid vil. s'isch wacker losgangä mit schtudierä und gross relaxe isch nümä. vilicht no zur erinnerig an alli treuä läser: hüt isch übrigens dr 23igscht. zumindescht bi mir no. und schliesslich dörft jo öppä jedä wüssä, was imne monet los isch...haha. also fanged scho mol all a flissig baschtlä...;)

gueti wuchä und hebed d'ohrä schtiif!