ist das der zoo von san diego?

adiooo, adiooo san diegoooo! am suntig hät ar mexikanische gränze also üseri abschiedstour agfange. gschtartet hämer am obed mit dr erkundig vom gaslamp quarter, wobi mer vo denä 16 blöcks glaub so zimli öppä all abgloffä sind.


wie sich uf dr heifahrt usegschtellt hät, isch üseri erscht unterkunft au grad no zimli nöch richtig downtown gläge gsi, was san diego natürli wiiteri pluspünkt bi üs verschafft hät. eher für weniger begeischterig hät gsorgt, dass vo de 5 lampe im hotelzimmer grosszügig grächnet öppä 2 richtig funktioniert hät. dr hotelmanager, eimol meh en inder, wo vilicht grad mit müeh und not mit schwiizer früehenglisch hät chönä mithalte, hät's denn leider bis zu üserä abreis am mitwuch nid fertig brocht, die aglägeheit z'reparierä. wie au immer. halb so wichtig, schliesslich simer jo nid uf san diego cho, zum die wuchä im hotelzimmer z'verbringe...

am mäntig simer drum richtig norde vor schtadt ufbrochä, zum die verschidenä beaches chli gnäuer under d'luupe z'neh. ja, z'erwähne isch a derä schtell vilicht no, dass s'thermometer ir zwüscheziit wieder schtarch gäg die 30 grad ufegschtiige isch, sodass mer nach beguetachtig vo mission und ocean beach, sowie la jolla denn churzerhand beschlossä händ, am zischtig en schtrandtag iizleggä. in la jolla, quasi am beverly hills vo san diego hämer übrigens no bimne franco-amerikaner gschpiise, wo s'klischee vom franzose englisch perfekt verköperert hät: "äääh, wud uuuu laaiiggäää to sidd insaidäää orrrrr outsiiiidäää?"...;)

am nomitag hämer üs nochli amerikanischi militärgschicht zu gemüte gfüehrt und dr flugzügträge u.s.s. midway aglueget. e rächts huerä böötli, wo gemäss überzügig vo allne freiwillige hälfer (wo am usgseh noh wahrschindli eher bim bau vo dem kahn als sus irgendwenn mol drmit z'tue gha händ...) also dr 1. irakkrieg praktisch elei gwunne hät. die amerikanische veterane händ sich also teilwiis rächt eriiferet und s'isch ne denn au relativ egal gsi, dass dr asiat i üserä bsuechergruppe nid grad bsunders glücklich driglueget hät, wo's sich über die gföhrliche chinesä usloh händ. trotz patriotismus und pathos bis zum geht nicht mehr, isch's doch recht interessant und vor allem unterhaltsam gsi.

dr beachtag am zischtig hät erschtuunlicherwiis rächt chüehler agfange als erwartet, aber trotzdem simer guten mutes richtig imperial beach im süde vor schtadt losgfahre. mit bade isch denn au nid würkli vil gsi. also nid, dass üs die arktische wassertemperature drvo abghalte hätted. vil meh d'lifeguards wo mit ihrem jeep dr schtrand uf- und abgfahre sind, und jedes mol "the beach is closed due to pollution" is wasser pääget händ, chum isch öpper hüfthöch dine gschtande. isch aber halb so schlimm gsi, so hämer immerhin meh ziit gha, üs gäge schätzigswiis 150 möwe z'verteidigä, wo vo üserä fressalie nid allzu vil übrig loh händ, chum hämer's mol us de auge loh.

dr hengi hät gottseidank irgendwo denn no en tschuttball erworbä, vo vermuetli sit dr wm 94 a säbem kiosk gläge isch. so hämer üs d'ziit chli mit kicke vertriibe, und für dass sich dr hengi dr chopf und dr steff beid arme verbrännt händ, hät's also grad glanget. am obed isch's denn wieder mol is kino gange, und zwar go "welcome home, roscoe jenkins" aluegä. die öppä 20 schwarze, wo mit üs im saal ghogget sind, händ also förmlich mitgläbt und ihri begeischterig für die eint oder ander szenä luuthals kundtue. mir händ vor luuter südschtaate-slang all zäme nid grad allzu vil verschtande. aber luschtig isch's einewäg gsi.

am mitwuch isch denn d'tourischteattraktion nummer 1 vo san diego ufem plan gschtande: sea world! s'wätter isch fangs merklich schlächter gsi, als i de täg drvor und churzi hose sind also nüme grad agseit gsi. schad insofern, dass öppä 90% vom ganze park verrusse gsi isch.

immerhin hät's nid afange schiffe, und vo killerwal über delphine hi zu haiä und seelöiä hämer also alles gseh. vo üs eischtimmig zum star vo allne shows isch allerdings dr otter erkorä worde. de hät zwar nid ganz so vil chönä wie die anderä tier, aber hät umso meh stil gha.

am sea world im ganze hämer allerdings doch nid sooo gueti note chönä usschtellä, wobi's vilicht eimol meh dra gläge isch, dassmer halt eventuell nümä grad dr zielgruppe vo dem park entschprochä händ. de vilne chinderbuggies vor de show-stadie a, hättemer do aber au sälber chönä druf cho...bim steff isch no drzue cho, dass sini gross hoffnig ("hoffentli frisst irgend sonen wal eis vo de chind!") au bir letschtä show nid erfüllt worde isch.

dr dunschtig hämer denn drmit gschtartet, üsseri schulde bim staat in form vo speeding ticket z'begliichä. die nett dame vom us postal service hät üs nid nur die ganz aglägeheit mit dem "money order" vo vorne bis hinde erklärt, sondern grad au no paar märkli verchauft, sodass mer üs denn in downtown munter as charte schriibe händ chönä mache. drnoh hämer üs nachem flugzügträger zum zweite mol nochli amerikanischi chriegsgschicht ineghauä und zwar in form vom marine corps museum. leider hät's genau womer usem museum cho sind agfange schiffe wie gschtört, sodass mer üs denn schnell ines kaffi im little italy gflüchtet händ.

am obed simer denn richtig mexikanischi grenzä abegfahre zum no die letschtä mitbringsel für dihei imne outlet z'bsorge. die mexikanische chunde sind zwiifelsohni ir überzahl gsi und im eintä lade händ d'securitas alli händ voll z'tue gha, d'mexikaner vonenand z'trennä, wo grad über z'hundertä paar abegschribni designer-schueh hergfalle sind. ein buntes treiben...dr steff hät sich im wältlädeli no mit tinkture und naturheilmitteli iideggt zum sini sälbschternannt gripp z'bekämpfe. dr heidegger hät wahrschindli die wohrscht freud dra gha. wie au immer, dr steff läbt also no, au wenner nach eigetä ussage am tod mängmol nöcher gsi isch, als am läbe...("ich bi todchrank...und das schtimmt also!")

balboa park isch dr programmpunkt nummer 1 am fritig gsi. en park, öppä so gross wie halb waleschtadt mit 7000 schlössli, gärte und museä. am steff isch vor luuter schönheit vo derä alag fascht z'augewasser cho...

schweren herzens hämer üs denn aber doch irgendwenn chönä vom park lösä, und sind richtig coronado island gfahre. s'coronado hotel isch anschinend wältberüehmt vo allne baywatch serie her...üs isch's uf all fäll nid bekannt vorcho...

en kaffi hämer uf dr inslä denn doch no gnoh und händ üs churz druf abe denn parat gmacht für's nightlife. säb isch im gaslamp quarter abghalte worde und dankme somalische taxifahrer, wo sit sinerä taxifahrer-prüefig vor 3 johr glaub nümä grad vil englisch gredt hät, simer denn au wieder wohlbehüetet zrugg cho in üsri abschtiigi.

zum grosse abschluss hämer üs am samstig no dr sageumwobeni, viel zitierti (z.b. im film madagascar...) und unvergliichlich schöni zoo von san diego inezogä. en uuuuuhuerä zoo, womer also glaub öppä 80% vo allne tier, wo irgendwo uf dr erdä imne chäfig iigschperrt sind, hät chönä gseh.

über 3 1/2 schtund simer also dri umegschuenet und drmit mer am obed nid nomol vo irgendwelche indische hotel-manager mit ihrne wuchenend-rote übers ohr ghaue werded, simer drum churzerhand am airport üsers nachtlager go ufschloh. do hoggemer ez und warted, bis üsre vogel irgendwenn denn hoffentli mol landet.

so, das wär's also gsi mit trix und gags! 34 mol hani ez do chli verzellt, was alls so abgange isch uf minerä und schpöter üserä tour dur'd us and a. ich hoff, die meh oder weniger zahlriche läser händ sich ab und zue mol chli amüsiert ab dem wo's gläse händ. ich han mi uf all fäll andurend amüsiert uf dr reis dur's land, wo würkli en u huuuuuuuufä z'büte hät. also, checkets us, und machets guet! see you im alltag!