mormone-fetä und natur pur in utah

ave maria, voll der gnade! läck du mir, do simer nach üserä akunft am samstimorge salt lake city go erkunde, und händ gmeint, mer säged im orate vom mittwuchmorgä glandet.


d'schtadt sälber isch rächt schön, umrundet vo bergä und irgendwo liit halt no en salzsee. vor höchi her liits öppä uf lüsis-level und drum isch's au entschprechend frisch gsi. und schnee hät's für üs nach south lake tahoe au zum zweitä mol z'gseh geh. aber nid nur das...womer während üserere sightseeing tour am temple square, quasi am hauptquartier vo de mormone glandet sind, hämer üs grad mol churz gfroget, öb mer a kollektivem tinnitus oder a wahnvorschtellige leidet.

dr ganz square isch mit chirchechor-gejaule beschallt worde und irgendwenn hät irgenden alte päppel au no afange us de luutschprecher predige. sehr suschpekt isch üs die ganz gschicht inecho, aber wiemer schpöter usgefunde händ, isch dr alass d'beerdigung vom oberschte mormone-prieschter gsi. das isch vermuetli au dr grund gsi, werum in ganz utah d'fahne uf halbmascht gschtande sind. oder zumindescht in salt lake city. im reschtä vo utah händ's nämli bis ez glaub erscht schtei und wiise erfunde...;)

wie au immer. rächt vil gläubiger simer uf üserä tour wiiterzoge, händ no paar überbliibsel vo de olympische schpil 2002 aglueget und sind schliesslich am gateway glandet. e riisigi outdoor-mall, womer nid nur e gueti location gfunde händ, zum am nächschte tag dr super-bowl (für alli unwüssendä, z'final vor amerikanische football-liga) z'luege. sondern ich grad au no e super billigi winterjacke. im gägezug drfür hani denn allerdings leider dr hengi und dr steff verlorä. aber nach öppä 1 1/2 schtund inschtinktiv ir vorher erwähnte bar wieder gfunde...

am obed hämer üsers bombe-hotel so richtig uskoschtet und händ üs z'erscht mol e rundi spa gönnt. leider hämer denn erscht am tag druf usegfunde, wo dr chnopf für d'schprudel im whirlpool gsi wär, aber immerhin. z'nightlife hät natürlich au müessä erkundet werdä, und nachdem mer üs bim schätzigswiis 18-jährige receptionischt informiert händ, hämer üs uf dr wäg gmacht. dr erscht vo üsem junge herr beschriibe klub isch denn au schnell gfunde gsi. dr steff isch denn no gschwind member vo dem klub worde isch, drmit mer überhaupt inedörfä händ und amne gmüetliche obed wär eigentlich nüt meh im wäg gschtande. wenn sich die ganz szeneri nach guet 3/4 schtund plötzlich als ü40-party entpuppt hät. d'live-band hät lieder gsunge, wo die meischte zuschauer wahrschindli scho d'usgangsziite für die eigetä chind feschtgleit händ, und so hämer üs denn irgendwenn vom acker gmacht.

die nächscht beiz hät erfreulicherwiis e halbschtund nach üserä akunft dicht gmacht, sodass der samstigobed au glaufe gsi wär.

aber halb so schlimm, so simer wenigschtens fit und munter gsi für dr super-bowl am nächschte tag. leider hämer ufgrund vo minime kommunikations-schwirigkeitä minersits mit dr bedienig s'buffet verpasst. allerdings isch üs denn allne zäme nachem verschpiise vom bschtelltä menu uf dr charte so schlächt gsi, dass mer einewäg nüt me hätted mögä. dr hengi hät währendem öppä 4 1/2 schtündige game öppä 4 liter coci light drunggä, sodassem d'servierdüse am schluss denn kei refill meh brocht hät, sondern churzerhand en ganze chrueg mit dr bemerkig "you're crazy...", uf dr tisch gschtellt hät. dr match isch übrigens uf öppä 20 flachbildschirm übertreit worde, und schlussendlich händ d'new york giants über d'new england patriots triumphiert. schad für d'patriots, wo bis zum final keis einzigs mol verlorä händ. schad au für dr steff und mich, wil mer uf d'patriots gsetzt händ. guet für dr hengi, wil...

nachdem mer die sportbar verloh händ, simer denn grad au mol wieder mit richtigem schneefall konfrontiert worde, und do bini natürli froh gsi, hani e neuii winterjagge drbi gha. ander hät's nid ganz so gfreut (siehe oben mitte...).

schweren herzens hämer üs in aller früh am nächschte morge vom bisher beschtä hotel uf üserä reis und sim z'morge-buffet verabschiedet und üs ufgmacht es zweits mol innerhalb vomne tag dur ganz utah z'chesslä. d'temperatur isch mittlerwiilä z'erscht mol ir usa id minusgrad gheit, aber dank üsererä air-condition isch das natürliz keis problem gsi.

dank üsererä minutiöse planig simer nach knapp 7 schtund fahrt denn irgendwenn mol ar grenzä zu arizona acho und hetted eigentlich no welä s'four corner monument, wo d'schtaate colorado, utha, arizona und new mexico a eim punkt zämechömed, go aluegä welä. usgrächnet a säbem punkt vor usa hät aber entweder d'schtrossebeschilderig oder ebä d'agabe uf üserä charte nüme gschtumme. beides hät uf jedä fall hine und vorne nümä zämepasst, und womer nach guet 10 meilä irgendwenn ufre schotterschtross acho sind, wo eigentlich als interstate ageh gsi isch, hämer üs denn schweren herzens gäge s'four corner monument entschiide.

säb isch allerdings einewäg nid die schlächtischt entscheidig gsi, wil sich d'sunne langsam aber sicher as undergoh gmacht hät. und s'monument valley isch schliesslich au no ufem tagesplan gschtande.

nachdem mer über d'grenzä vor arizona kesslät sind, hät zu üserem glück au no dr wulkäverhangä himmel ufgrisse und im undergehendä sunneliecht hät also nid mol meh dr marlboro-cowboy öppis zunerä besserä szenerie chönä biiträge. für mich isch das also öppis vom iidrücklichschte gsi, woni bis ez ir usa gseh han.

föteli gschossä hämer drum wie wild, und churz vorem sunneundergang hättemer wahrschindli no das beschti usa-picture ever chönä schüssä, hät nid dr steff de lappi no en churze rückfall is militär-schtadium erliite und vor luuter ehrfurcht vorem monument valley salutiert. jä nu. ir dämmerig hämer die letschtä knapp 200 meilä vo üserä tagesroute nach flagstaff hinder üs brocht, womer schliesslich au d'nacht verbrocht händ.

am zischtig simer meh oder weniger früeh ufbrochä, zum üs e wiiteri dosis natur pur inezhauä. s'ziel isch hüt dr grand canyon gsi. nach knapp 90 meilä fahrt hät denn nid wiemer vilicht am under bild a erwartä chönt, dr venga-party-bus zu üs ufgschlossä. nei, wiederum hämer es chliises rencontre gha mit de polizei, wo üs fründlicherwiis grad au no d'gschwindigkeitsregelig vom schtaat arizona duregeh hät. so hämer also innert nur 4 täg d'tempolimits vo 2 schtaate känneglernt...und sogar dr officer hät chli müessä schmunzle, wo dr michi schumacher uf d'frog "did you ever get a ticket?", die vilsagend antwort geh hät: "in arizona...?"

nach 20 minütiger wiitefahrt hät sich irgendwenn mol dr bode ufgrisse und dr grand canyon isch zum vorschii cho. 17 kilometer ir breiti und weiss nid wievil ir länge hät do irgenden river innert 1000ige vo johre es loch inegschliffe. würkli sehr imposant, vor allem wil das ganzi rächt unerwartet ufzmol hinder es paar tanne uftaucht isch.

natürli hämer denn alli mögliche ussichtspünkt uscheckt, sowie au no s'hopi house. die erschtä wo dr canyon entdeckt händ sind nämli es paar indianer gsi. gnau usegfunde, vo wo das die gsi sind, hämer nonid. möglicherwiis aber vo heiligchrüz.

sovil ahnegschicht hät natürli au grad müessä feschtghalte werdä...uf üsererä wiiterfahrt nach arizona hämer nid grad numä nomol öppä 230 meilä zrugggleit, sondern au no en temperatur-aaschtiig vo sicher 23 grad erläbt. nid dasses do ez 30 grad im schatte wär, aber bim canyon uf 2400 meter isch halt scho eher chüehl gsi...

do in phoenix isch ez au d'vegetation rächt andersch und d'kaktus dominieret d'landschaft. geschter hämer no vergäbens öppä 2 1/2 schtund lang es billigers hotel, als das womer als erschts atroffä händ, gsuecht...und ez simer ready, zum dr schwiizer match gäg england z'verfolge. mit live-stream im internet.

also hopp schwiiz!