wie phoenix aus der asche...

holla, holla! für das, dass phoenix usme verlassene pueblo-dorf entschande isch (quasi wie dr phoenix us dr asche...haha) händ's us dr hauptschtadt vo arizona also grad nochli öppis drus gmacht!


obwohl mer am afang vo üserem bsuech no es paar bedenggä betreffend infrastruktur gha händ. dr fuessball-match schwiiz-england hämer nämli am mitwuch 90 minute lang vergeblich versuecht über s'internet z'luegä. s'signal isch grad mol gnueg schtarch gsi für dr ticker und so hämer immerhin no gnueg vom schpil mit übercho, dass d'schtimmig chli in chäller gsackt isch. nichtsdestotrotz hämer üs drnoh richtig downtown ufgmacht und üs mit sightseeing undem chauf vo tickets für's basketball game phoenix suns gäge d'seattle supersonics wieder einigermasse chönä ufheiterä.

downtown hät bis uf paar business-wulkächratzer und sportstadie ez nid sooo vil hergeh, sodass mer üs am dunschtig mol dra gmacht händ, d'vorort chli z'erkundä. dr nomitag hämer schliesslich in scottsdale, erä mehbesserä- und pensionäre-schtadt verbrocht. s'wetter hät besser nid chönä sii und rächt unterhaltsam isches au gsi. bim z'mittagässe hämer näbscht burger grad au no live-countrymusig gnossä, und mitem gratis-trolleybus hämer schliesslich öppä die halb schtadt abkesslet.

wahnsinnig abgange isch's allerdings trotzdem nid, und bi de meischte lüüt hät mer chönä meine, si säged sit dr gründig vor schtadt uf de schtrosse underwegs...(siehe bild oben...) drum simer denn wiiter, ine riisigi mall mit vergnüegigsmöglichkeitä à gogo und bi spielsalon und bowling isch's üs denn willsgott nümä langwilig gsi.

eigentlich händ's zwar au in scottsdale rächt vil drfür tue, d'lüüt z'unterhalte, aber wahrschindli simer für missions-kapellä, wo vo 70-jährige gfüehrt werded und rössli-kutsche fahre vilicht au eifach nid grad unbedingt s'zielpublikum gsi...luschtig hämer's uf jedä fall gha...

am fritig hämer denn no üserä toyota, wo während 4 1/2 wuchä umechesslä optisch doch fang rächt schtarch glitte gha hät, wieder uf vordermann brocht. d'express-wösch hät leider denn aber nume grad bis zur hinderachs glanget, sodass ez numä grad d'fassade würkli suuber usgseht. aber dr guet wille isch immerhin ume gsi...

am obed isch in scottsdale so richtig nightlife aagseit gsi. schliesslich händ's det es ganzes viertel gha, wo einzig und elei am entertainment gwidmet isch. im axis, wo angeblich scho stars wie dr p. diddy und 50 cent abgschtiige sind, isch's denn au rächt zue und her gange, obwohl mer z'erscht umes hoor nid mol inecho wäred. wär nid eine vo de unzählige tüürsteher irgendsone franco-portugiesischi amerikaner-mischig gsi, wo uf all fäll irgendwenn mol in europa gwohnt hät, hät üs also niemerd glaubt, dass d'schwiizer-id nid e fälschig gsi isch. sin guetä rotschlog: "the next time, take your passport with you!". jaja, unbedingt. uf all fäll hämer wieder rächt luschtigi und interessanti lüüt känneglernt, und sind am morge am drü denn no mit es paar schwarze go z'mörgelä und händ drbi no über verschiideni zahligsmethode und anderi hochinteressanti themä diskutiert.

leider hät dr obed uf dr rückfahrt zu üserem hotel zumindescht für mich chli an luschtigkeit verlorä, wil d'schtadt phoenix unbedingt no es foti vo üserem neugwäschene toyota mit mir am schtüür hät welä ha. shit happens...dr tag druf hämer denn no welä das ander ticket, womer vorem grand canyon übercho händ, go zahle. en vergebliche spiessroutelauf über zwei verschideni gricht und s'polizei-hauptquartier schpöter, hämer denn allerdings ufgeh, wil die letscht dame vielsagend gmeint hät: "there's nothing you can do right now..." au guet...

en wiiterä unzählige mall-bsuech schpöter hämer üs nochli kultur inezogä. z'grande pueblo museum hätti eigentlich sölle darschtellä, wie d'pueblo-siedler i de gründigsjohre so in phoenix ghuuset händ. entweder händ die guetä museumsbauer aber nid allzuvil ziit gha, zum die ganze muure usgrabe, oder sus händ d'pueblos nid grad unbedingt dr baupriis im muure ufzüchä gwunne. uf all fäll, hät das openair-museum ez keinä vo üs grad us de söckä ghaue, aber immerhin simer froh gsi, dass so d'ziit bis am obed am 7i chli verchürzt worde isch.

denn isch nämli apfiff gsi für s'basketball-game vo de phoenix suns. und dr steff, ganz alte basketball-fan, hät sich nach michael jordan schueh grad au no es steve nash (vermuetlich momentan eis vo de erfolgriichschte wiisbröter ir nba) shirt kauft. für eimol hät s'heimteam womer underschtützt händ, sogar au no gwunne, und s'schpil hät würkli schpannig bis zum schluss bote.

ganz nachem motto "when the suns win, you win too...", hämer denn grad au no dr z'nacht in form vo gratis-mcdonalds-pommes-frites gschponseret übercho. tolli sach. und optimal, wil mer grad nachem game wiitergfahre sind weg vom hoteltechnisch tüüre phoenix zrugg nach kalifornie. gnächtiget hämer in blythe und det wäg dr überquerig vor ziitzone no unabsichtlich e schtund weniger lang pennt. wie gseit, shit happens...;) uf unerklärlichi wiis simer schliesslich denn no a üserem eigentliche tagesziil palm springs verbigheizt, sodass mer eimol meh inre unverglichlichä spontanitäts-aktion d'reisedestination uf anaheim gänderet händ.

det händ üs wohligi 86 grad fahrenheit erwartet. für die wo sich d'müeh mit umrächne nid mache wennd: 30 grad celsius...haha. und das im februar. besser hät's jo wohl nümä chönä cho. und üsers motel hät zu allem herä grad au no en pool gha. d'tatsach, dass direkt drnäbed dr highway duregfüehrt hät, hät d'begeischterig au nid chönä trüebä, sodass mer en relaxetä nomitag verbocht händ.

hüt hämer üs ufgmacht richtig san diego und händ underwägs no all die verschiidenä schtränd vo huntington über newport bis nach laguna beach und oceanside aglueget. s'wätter verwöhnt üs momentan grad mit schwiizerische juni-temperaturä, und san diego hät vom erschtä iidruck her au so einiges z'büüte. s'gseht also ganz drnoh us, als öb's für üserä trip en bombe abschluss geh würd!

ich hoff, s'git denn nomol en wiiter bricht und falls nid: ez scho allne "happy valentine"...;)