back to sekundarschuel

my lovely mister singing club! ez isch denn d'party öppä verbi. am mittwuch und dunschtig hani ez z'erscht mol classes gha! crazy, echt crazy! die sind nid ganz klar do ir usa: für drü ects-pünktli ar uni hani so zimli i jederä klass öppä folgends programm: mindeschtens vier teschts übers ganz semeschter verteilt, denn zwei quizzes, wo's denn irgendwenn mol ineschneiä chan, denn mindeschtens ei arbet wo'd sälber verfassä muesch und zu guter letzt no es group project, wo'd am schluss denn präsentierä dörfsch. meine fresse! und das mal füf. nice...allgemein chamer säge, dasi rächt vil verschtoh und d'klassä sind nid schlächt und no interessant. aber teilwiis isches wie chindsgi mit derä betreuiig. sind halt nur amel öppä 35 lüüt und im letschtä kurs am dunschtig hät d'professorin tatsächlich no erklärt, wiemer ez am beschtä gruppe bildet und was mer die anderä froge söll. denn hät si das denn au no vorzeigt. wie im chindsgi! und die amerikanische studis händ teilwiis ez so putz kei ahnig vom läbä usserhalb vor usa. im international management hät d'professorin gfrogt: what's burkina faso? streggt nachre halbe minutä schwiigä eine uf und seit: it's a king...? bi usbekistan sind's denn natürli genau so überfrogt gsi wie bi liechtestei. aber dr dütsch und ich händ denn drfür gross chönä uftrumpfä. s'git sogar no geographie-tescht i derä klass, damit weisch, wo d'länder sind...köschtlich.

ein kurs isch denn aber grad chli gar schief gsi und zwar isch das sonen ifüehrigskurs woni mit de freshmen han. det bini wiitus dr ältischt und zum s'prinzip vor uswirkig vo massäkommunikation z'erkläre hämer denn grad au mol s'telefon-schpili mit wörtli iiflüschterä und luegä was usechunt, gschpilt. sensationell.

d'uni isch eigentlich aber glaub nid schlächt. d'betreuuig isch hundert mol besser als ir schwiiz und dr eint prof hät sogar gmeint, "I don't mind, if you call me at half past 11 in the night!". allgemein isch's mol abgseh vor vilä arbet rächt vil lockerer, en anderä prof isch uf dr tisch ufeghoggt im schnidersitz und hät so afangä verzellä. jaja, duzä chamer au fascht all. d'schtudentä und d'lüüt sind komischerwiis viiiiieeellll offener als ir schwiz. ir cafeteria chasch zum bischpil chum 2 minutä elei hoggä, bis scho einä frogt, öber sich zue dr setzä dörf. und nach 2 minutä redä wännds denn au scho dini number zum mol für "hangin' out together" abzmachä. und wenn's denn ufem gang gsehsch git's nur no eis "yo, wassup, buddy?". jaja, die amerikaner. wenn'd wetsch chöntsch echt dr ganz tag chli umelaufä und "wassup" dur d'gägend brüllä. sehr luschtig.

über der kulturschock abä hämer denn natürli geschter grad mol müessä s'wuchenend miträ house-pardey iilütä. drvor bini mitem mo, mim irakische roombuddy no churz sones chrischtä-klub-konzert go losä, wil's gratis glace geh hät det. dr mo zücht ez definitiv us und drfür chumi irgend sonen simbabwischä stammeshäuptling über. mal schaun...

die fett chue z'oberscht ufem föteli isch übrigens e tochter vom irgendsomne fox-news reporter. müess do rächt famous si. dick isch si trotzdem...haha

das do isch übrigens dr bernd stromberg aka philipp, er chan vermuetli öppä 90 prozent vo allne folgä uswendig. sensationell. er isch 26i aber vermuetli dr gröscht chindschopf vo allne wo do umeschtüüret. de unde rächts isch dr jonas, mit denä hani so zimli am meischtä z'tue.

drmit denn z'waleschtadt nid z'grücht umegoht, ich säg do imne schwulä-college, do unde no es bild vonre schpanier. isch krass, die chönd ez no schlächter schpanisch als ich chochä. ganz krass. aber ja, luschtig isch zum zuelosä uf all fäll. eigentlich händ dr jonas und ich denn geschter no welä d'hoor schorä - trotz em protescht vo de schpanier. aber dr rasierer hät denn gäge mini geballt lockä-pracht verlorä und drum sind die ez no dra. drfür gangi ez denn mol zum barber.

jaja, a derä party isch's denn no rächt zue und her gangä. wer wüssä will, wie mini momentan verfassig isch, dem empfehli mol s'lied "worst hangover ever" vo offspring z'losä. und wenni nochher nomol verrussä gang, verjätet's mi denn wahrschindli einewäg komplett, wil's scho wieder 37 grad hät...;)

so, morn gohts mol uf atlanta das baseball-game go luegä und nochli go shoppä. mo luegä, öb mer vo üsernä 18 dollar plätz us ds schpiilfäld überhaupt gsehnd. aber vil tüüreri hämer üs nid chönä leischtä. die büecher do sind scheiss tüür. minimum 120 dollar. und die schlaue europäer händ ez natürli dänggt, so nicht! und drum hämer's über amazon bschtellt. dumm isch ez halt nur, dass mer die fang in öppä zwei wuchä denn mol händ. haha. jä nu, git au ohni z'läsä rächt vil z'tue. schöns weekend denn mol!