orientation, orientation und nomol orientation

holla, die waldfee! do goht jo einiges ir usa. also, mol ar reihä noch. am suntig bini jo z'erscht mol so richtig en tag ir usa gsi. nach öppä 7000 schtund orientation und öppä 100 sitä info-material isch denn am obed mol d'casino-night agschtandä. dr campus vor uni beinhaltet öppä 30 bis 40 gebäude, drunter e chirchä, wo's zumne student-center umbaut händ und det dri isch ebä die casino-night gsi. eigentlich hämer drvor no welä go alkohol poschtä, zum chli in gamble-luunä cho. woni denn aber mit de dütschä vorem regal gschtandä bin im wal-mart (gschätzti 300 uf 200 meter ladeflächi...!) hät denn e netti schwarzi damä gfroget, öb mer vo do säged, wil mer in georgia amne suntig halt ebä kei bier chaufä chan. schade gsi. ar casino-night hät's denn leider au kei alkohol geh, wil die meischtä halt nonid 21i sind ufem campus. you know, it's the law, bro! würd ez dr iraki us mim zimmer dodrzue wahrschindli säge.

anyway, dr öschtricher wo mit üs amel abhängt, hät a derä casino-night denn uf all fäll en ipod abgruumet, obwohler mit sine paar chips nur grad 3 lösli gha hät. köstlich isch's uf all fäll gsi. und many many cool people hämer natürli au no gmeetet, wie fascht jedä tag. sind sowieso alli amel so überrascht und findet's so lässig, dassmer us dr schwiz oder nur scho us europa isch, dass dr vorchunsch wie s'achti wältwunder. a säbem obed hät mi denn aber tatsächlich no eini gfroget, öb mer bi üs au elektrizität händ. denn hani scho mol müessä frogä, öb si das ez serious gmeint heig...hät si denn tatsächlich au...

am suntig hani denn mitem öschtricher zäme au no mol all die registration gmacht und das organisatorisch zügs. ar sunrise hani au no aglütet und ez chani ufem altä handy au wieder sms empfangä (+41787352734). sus chöndr natürli au gern am bischpil vom nuss folgä und comments postä im blog. am tag dur isch wieder öppä 39 grad gsi und wenn'd amel us de uf 20 grad abeküehlte rüüm usechunsch, schtrählets di amel fascht hinderä. aber mer gwöhnt sich dra.

nachdemi das zügs gmacht gha han bini denn mit mim iraki-roombuddy mol no is gym. das isch übrigens der do ufem bild mit dr superman-pose. oder was das au immer si söll. whatever. uf jedefall isch die fitness-hall no rächt guet usgrüschtet und klimatisiert. ez gangi halt amel chli ufem laufband go ränne, wil dusä müesstisch irgendwie am morgä am 5i go, damit's verliidisch. dr iraki zücht vilicht us. vilicht aber au nid, er isch rächt unschlüssig. aber wenigschtens bringt er chli ghetto-feeling id budä. wenner wennd, chönder das au dihei mol usprobierä: hängget eifach a jedä satz es "y'a know, bro?" oder "yeah, man!" a. sehr cool anschinend.


am mäntig obed isch denn nach paar schtundä orientation ds international picnic am lake sinclair agschtande. das isch abartig gsi. irgendso en professor hät sini hüttä zur verfüegig gstellt und die liit würkli direkt am see. chli böötli-fahrä isch denn au no dinegläge und nachem buffet und me chlinä shopping-trip im wal-mart simer denn no is appartement vo de dütschä chli go biernä. also isch wieder mol richtig schträng gsi.


do unde im bötli hoggi übrigens näbedem öschtricher undem dütsche. ganz easy typä. ir zwüscheziit hämer üs au all zäme sones prepaid-handy kauft, drmit mer gratis mitenand callä chönd. am samstig gömer wahrschindli mol d'atlanta braves, also s'baseball go luegä. au wenn das anschinend langwilig wie d'schissi si söll. aber schau mer mal. in milledgeville bliibe mer uf all fäll nüt, wil do lauft ez am johrestreff vom ornithologischä verein vermuetli no meh. aber ja...

nachdemi hüt die letscht schpartä orientation hinder mich brocht han, hämer üs natürli chli erholä müessä und sind drum denn an pool vo de dütschä. die wohned ebä im bobcat village, wo's es appartement händ. drüfr zahleds au chli meh. dr pool isch chli chälter gsi als dr lake sinclair am mäntig, aber immer no minimum 27 grad. minimum. aber chli abküehlt hät's trotzdem.

morn fanged ez d'classes a, mol luegä, wie das so lauft. aber chli azüche wird's vermuetli scho no we'll see! mit de dütschä und em öschtricher zäme hani amel scho paar rächt easy lüüt gfundä. mol luegä, wie's wuchenend no so wird.