international club

holla die waldfee! so, bald isch au scho die zweit wuchä durä und langsam chehrt do so öppis wie alltag ii. also mit uni bini mittlerwilä rächt usglaschtet und chan sicher jedä tag öppä 100 siitä läse, ez woni scho mol knapp d'hälfti vo allne büecher han. drum isch au nümä grad so grossartig vil los mit usgang. am suntig simer no s'letscht mol üserä mietcharrä go usnutzä und i sone mall iz kino. isch nid würkli vil billiger als ir schwiz, also mir händ au 7 dollar zahlt. liit vilicht aber au dra, dassmer do z'milledgeville eifach würkli voll ir pampa sind und mer s'kino z'4. bsetzt händ...aber born ultimatum chani uf all fäll nur empfehlä.

die dütschä händ denn unbedingt no müessä irgendso huushaltsutensiliä ha, und drum simer nachem film denn no churz in wal-mart, wil de hät jo bekanntlich 24 h offä. det hani denn au grad s'untenstehendi wägeli entdeckt, wo de obese-people vermuetli dr iichauf chli erliechterä sött. minä chorb hani denn au prompt mit 20 chleiderbügel à 97 cent gfüllt, wil am mäntig isch bi mir undem öschtricher wäschtag agschtande. erschtunlicherwiis isch das denn nid schlächt usecho, aber d'tröchnigsmaschine hämer denn glich nid gwogt z'benutzä. die dütschä händ nämli gseit gha, ihri chleider hättets beschtefalls ir chinderabteilig no chönä aapriisä. drum han ich denn mini chleider churzerhand a mini 20 kauftä chleiderbügel ufghängt und die waar in 2. chaschtä ghängt. mitem göffnetä fenschter isch das denn bi gschätzter ussetemperatur vo wiedermol öppä 34 grad ruck-zuck trochä gsi (siehe 1. bild). übrigens bini ez bis auf weiteres elei i dem doppelzimmer, wil am iraker händ's glaub s'gäld grad für s'ganz semeschter abknüpft, drum chunt ez dr afrikaner glaub doch nid. we'll see. jaja, die uni, ebä git rächt vil z'tue momentan. und muesch au immer am ball bliibä.

am zischtig hät's scho dr erschti unannounced tescht inegschneit, isch allerdings denn no guet gangä. i säbem fach, also international management, sind dr jonas und ich als europäer einewäg d'heldä und drum hämer denn au grad mol chli dörfä über dr fall vor berliner muur verzellä, wil d'teacherin glaub nid würkli sooooo e riisä ahnig gha hät. allgemein isch's niveau scho rächt vil tüüfer als ir schwiiz, aber wil halt alles englisch isch, chunts für üs grad öppä wieder uf s'glichä use wie dihei. aber mängisch isch's halt scho chli gar chintsch. do chasch ez als schtudent jedä huerä schissdrägg frogä. im consumer behavior isch's irgendwie um priisverglich vo autos im internet gangä und nachdem dr teacher e halbschtund referiert hät, seit eini: "well, seems like you really know 'lot 'bout cars. would you say, if my car-seller tells me I gotta take premium gas...is middle enough good...?" unglaublich. und die beantwortet das denn au no im heiligä ernscht. oder die allerbescht klass isch jo die woni mit de freshman han. frogt d'teacherin hüt: "in which way, does media affect you?" und denn git eine die glorios, und für's fach massemediä wahnisinnig entscheidend antwort: "I don't like to drink sprite anymore, because of the two sumo-wrestlers in the tv-ad." mein gott. leider sind öppä 80% vo de antwortä so. aber ja, mer stohts durä.

schön wär trotzdem mol no, wenni endlich mol all büecher zuegschiggt übercho wür. schliesslich sind all über 400 dollar gsi. zimli vil meh, alsi ir schwiiz amel so usgeh han. geschter simer no churz ufes bier downtown, was denn leider aber wieder mol chli usgartet isch und mit öppä 5 pitcher und me orientierigslosä dütschä gändet hät. pictures sind do leider nid verfüegbar, aber ja. vilicht nid sooooo schlimm.

hüt sch denn wieder international club gsi, where you always can meet funny people from all over the world. würkli funny. vor allem gits immer gratis z'suufä und frässe und das mol hät's sogar swiss chocolate gha. lindor-chuglä. hani denn natürli grad müessä uscheckä. leider sind's denn aber glaub vomne exchange-student gsi, wo sin ustusch grad churz nach dr gründig vo lindor gmacht gha hät. ich han's uf all fäll besser in erinnerig. ja, what did else happen? not much, am zischtig no biz go joggä ufem laufband im gym, wo uf öppä 3 grad abeküehlt isch, drmit's di denn fascht hindeusä nimmt bim heilaufä. aber passt. allgemein chamer no säge, dass d'uni scho krass andersch organisiert isch, als ir schwiiz. do isch de student echt dr chund und alles isch uf dich fokussiert. ebä, mer händ do pool, gym, career center, student consultant, student healt care, jenschti aläss, und ALL FOR FREE! do chönted sich d'schwizer scho no e schiibä abschnidä. geschter hät's zum bischpil es management meeting geh, mit free pizza und wenn'd gangä bisch, häsch no 2 credits für dini gsamt-notä übercho. hani denn aber leider verpasst...

s'beschtä isch jo scho gsi, wo ein professor gseit hät: "I really care about you. I'm not kidding. when you're in real trouble, don't hesitate to call me, I come and help you! well, not if you're running out of beer at 2 o'clock in the morning. but if you're out late and there's noone to drive you home, I'll come and get you!" jaja, die amis. luschtigi type.

dr 2. vo links isch do übrigens dr miklos vo serbiä und hät e leberä us beton. vermuetli chönter mit 1 liter wodka intus no gradus laufä. englisch chönter aber wahrschindli au denn nid besser. dr 2. vo rächts isch dr kelly. nid gad en schönheitskönig, aber er erinneret mi immer an chris vo familiy guy. wer au derä meinig isch, söll bitte en kommentar schribä, er glaubts nämli nid. ja, die wiiber weissi au nid gnau. die rächts isch vo kolumbiä und die schwarz usem dr. best zahbürschtä land. nei, glaub irgendwo senegal oder so. haha. so, morn isch bi mir wieder wuchendend! für eu goht's jo au nümä lang!