baseball isch sooooo langwilig!

läck mer am arsch! beschwered eu nie meh überen match vom fc waleschtadt! au wenner bim hansi ackermann e saison-chartä kauft händ...;) also wenn ez ir usa ein sport vo basketball, football, icehockey und baseball ganz sicher dr langwiiligscht isch, denn dr letscht. aber z'erscht mol dr reihä noch.

am fritig hämer üs nachdem all dr hangover uskuriert händ mol es auto gmietet. en dogde. hoho, dänked ez sicher all, aber leider isch's denn nur en dodge neon gsi. en uuuuhuerä schüsslä, aber wenigschtens hät's e klima gha. mit dem simer denn mol chli go umecruisä und denn no uf macon, die nächscht grösser schtadt. also guet, eigentlich isch so zimli jedi schtadt um milledgeville umä grösser, aber ja. det hät's en outlet-store gha. das chönder eu nid vorschtellä: sicher uf 500 meter längi öppä 25 läde vo tommy hilfiger, bis billabong zu ralph lauren und so. det hämer denn natürli grad mol chli skate-wear ikauft, dr jonas und ich. also eigentlich eher er, ich han dänggt, ich chauf mol numä zwei volcom-liibli für 25 us-$. nützt jo nüt, wenni ez scho 1000 sachä chauf und nochher no bim reisä hät umebugglä muess.

am samstig simer denn richtig atlanta gheadet. das hät denn doch öppä 2 1/2 schtund durät. und glohnt hät sich's nid würklich. mues mer leider säge. d'stadt isch ez nid würkli die bombä, und usser dem plunder wo's vo de olympische schpiil im 96i no hät, git's nid würkli sehenswürdigkeitä. dr zoo und coca cola vilicht no, aber das gömer denn es anders mol no go uscheckä. z'erscht simer mol s'cnn-center go aluegä, wo'd us-news produced werded. isch ez nid würkli wältbewegend, usser dass öppä 20 riiisiiigi flat-screens ufghängt sind und links und rächts im basement minimum 10 verschiedeni fast-food-chettenä ihren platz händ. ja, ebä, nid würkli wahnsinnig interessant.

genau so wenig spannend isch denn leider au dr olympischi park gsi z'mitzt ir city. und dr brunne hät wahrschindli no sini problem gha, zum mitem wasserschpil z'waleschtadt mitzhaltä. ir city isch au überhaupt nüt los gsi, nid mol downtown, aber wahrschindli isch das dra gläge, dass dussä wieder mol öppä 38 grad gsi sind und sich drum die meischtä lüüt i die klimatisiertä malls gschleppt händ.

so eini hämer denn drum grad au mol no gsuecht, zum dr öschtricher neui izchleidä. also wenner s'nächscht mol id schteiermark gönd, würd mi in acht neh...siehe unten...

denn isches entlich sowiit gsi. nachdem mer no zwei fründä vo de dütschä troffä händ, wo üs denn fründlicherwiis grad au no für thanksgiving zu sich hei iigladä händ, simer as game. d'atlanta braves sind vo de vier major-klubs in atlanta glaub so zimli die beschtä, wobi s'football und s'basketball team glaub einewäg amel eher am tabelläendi ufzfindä sind. uf all fäll simer denn mol zum turner field, zum stadion, wo chli usserhalb vor schtadt liit und det sind d'amis denn vor ihrne pick-ups scho wacker am grillä und bbq machä gsi. es riisä brimborium. kei ahnig, wievil lüüt dass das stadion fasst, aber s'sind uf all fäll e huufä det gsi. und die sind denn natürli au ruck-zuck all ufgschtandä, wo'd nationalhymne gsungä wordä isch. und erscht dr jubel drnoh...! leider isch's denn das aber au scho so zimli gsi mit jublä und zwar für's ganzi schpil. dr braves sind gäge d'arizona diamondbacks kläglich mit 6 zu 12 untergangä und im prinzip simer nur 3 h uf üsem platz ghogget und händ gwartet, bis echt endlich wieder mol irgend sone fläsche en homerun schloht. also grad ustrainiert händ die type nid grad usgseh. aber isch jo au no pre-saison. und i de nächschte 3 täg hät atlanta intelligenterwiis ja grad no 3 mol d'chance zum's de diamondbacks heizzahlä. mues sehr abwechsligsriich si für d'schpieler...für d'zuschauer wahrschindli au ungemein...

uf das abe hani dänggt, machi mir us protescht doch grad mol en lässige churzhoorschnitt. nei, eigentlich hani's meh wäg dr hitz gmacht, wil do sind langi hoor scho nid grad soooo luschtig. gottseidank hät's im wal-mart wo 24 h und 7 täg ir wuchä offä hät, denn grad au no en barber gha und de hät denn sin schorer zückt. und do isch ez z'resultat...;) aaah, ja, no chlini anekdotä zu dem: dr barber hät mi no gfroget, öbi ads milledgeville army college gäng, wil hüt säge grad no drü ander cho, zum au sone tolli fritte z'machä. hani denn leider müessä verneinä.

no e chlini amerkig bzgl. militär: alli wo immer no im glaubä sind, im dütschä rennets mit HOLZGWEHR dur dr wald: vergässts. dr philipp isch bi de falschirmjäger gsi und de hät sich fascht id hosä pisst vor lachä, wonen das gfroget han. anyway, guetä schtart id wuchä!